ODF DISTRICT LEVEL VERIFICATION TEAM THUKHAWM


Dated Serchhip, the 14th June, 2017: Vawiin hian Serchhip District Water and Sanitation Missions hnuaia District chhung endiktu tur District Level Verification Team te chu SDO Sadaar Pu R. Vanrengpuia hovin an thukhawm a, District chhunga khaw hrang hrangte endik dan tur an rel.

Swachh Bharat Missions (Gramin) hnuaia thingtlang khua, khawlaia inthiar awmlohna khua (Open Defacation Free) ah RD Block khat huam chhunga khua zawng zawngten an neih kim hnuah Open Defacation Free Block an lo ni a. Chu ODF Block te chu District Level Verification Team te chuan an endik leh vek tur tih a nih angin; Serchhip District chhunga Block pahnih, E Lungdar leh Serchhip Block chhunga khua zawng zawngten ODF Village a an inpuan tawh avangin endik hna hi kalpui tura ruahman a ni ta ani.

Vawiina District Level Verification Team thukhawmte hian endik dan tur guidelines in a phut angin Block pahnih chhunga khaw panga ve ve an thlang chhuaka, chung khaw thlan chhuaha kala a hmuna va endik tur pawl hnih insiam nghalin ni 20th June, 2017 hian heng khuate hi tlawh nise tiin an rel a ni.

Member Secretary Pu F. Lalsanglura, EE, PHED Serchhip chuan Swachh Bharat hnuaia hmalak dan hrang hrangte leh hmachhawp la awmte tarlanna a nei a, ODF District kan nih theihna tura kalkawngte pawh member kalkhawmte hnenah sawifiahna a nei bawk.

Source: DIPR, Serchhip