KANGMEI LAKA MIPUITE HIM NAN DISTRICT MAGISTRATE-IN THUPEK A CHHUAH


Dated Serchhip, the 14th February, 2017: Dt 8th February, 2017 khan Serchhip District Magistrate, Dr. Lalrozama, IAS chuan a hnuaia mi ang hian Serchhip District mipuite hriat tur leh zawm tur thupek a ti chhuak.

Kum tina sik leh sa inthlak dan angin tunlai hi thal lai niin khua a lo ro tan ta hle mai. In lam leh ram lamah kangmei a chhuak duh em em a. Kan eizawnna avangin lo kan vat lo thei lova, kan lo hal avang leh in lama kan fimkhur tawk loh avangin kum tinin ram ngaw zau tham tak mai a kang chhe thin a, tin, kan in leh bungrua hlu tak tak a kang ral thin bawk. Ram kang leh in kangte hi a tam ber chu kan fimkhur tawk loh vang leh kan inthlahdah vang a ni a. Lo/huan leh Leipui kan hal dawnin mei lam kan sah that loh vang a ni fo bawk. Suahsual vang hrim hrimin ram kan ti kang bawk thin. Kangmei laka kan in leh bungrua leh nungchate kan him tlan nan khapna thupek chhuah hi thil tul tak a ni.

Chuvangin, kei, Dr. Lalrozama, IAS, District Magistrate, Serchhip District, Serchhip chuan Section 144 Cr. PC in thuneihna min pek hmangin a hnuaia mi ang hian khapna thupek ka chhuah e.

1. Mi tumahin meilam tha tawk sial hmasa lo chuan lo/huan leh leipui an hal tur a ni lo.
2. Mi tumahin mihring nunna leh bungrua/ro thil tana hlauhthawnawm chi reng rengin kangmei an ti chhuak tur a ni lo.
3. Mi tumahin eirawngbawlna leh ran chaw chhumna leh intihlumna atana hman- thuk, meihawl, khawnvartui, gas, electrict thuk etc. Kangmei duhawmlo tichhuak thei zawngin an chelek/hmang tur a ni lo.
4. Mi tumahin ramhnuaia an meichhem ti mit lovin an kalsan tur a ni lo.

He thupek hi hman nghal tur niin, sut leh anih hma chuan thla hnih chhung atan hman tur a ni. He thupek bawhchhiate chu Section 188 IPC angin hrem theih a ni.

Vawiin 8th February, 2017 hian District Magistrate Seal nen hming ka ziah hnan e.

Source: DIPR, Serchhip