SERCHHIP-AH HOME MINISTER HOVIN “KUTHNATHAWKTUTE NI” URHSUN TAKA HMAN A NI


Serchhip: 14th January, 2013: Mizoram sawrkar ruahman angin vawiin khan Serchhip DC Conference Hall-ah Serchhip District pualin “Kuthnathawktute Ni” hman a ni a, Home Minister Pu R.Lalzirliana chuan khuallian niin he hun hi a hmanpui. He hunah hian NLUP First Phase hnuaia hnathawk tha zual mipathum hnenah lawmman hlan an ni a, Serchhip-a Sawrkar Gazetted Officer te, Tlawmngai Pawl, khawtlang leh Kohhran hruaitute bakah Kuthnathawktute he hun hmang tur hian an kal tha hle a ni.

Home Minister Pu R.lalzirliana chuan kalkhawm te hma a thusawiin ‘Kuthnathawktute Ni’ kum tin a hman tawh tura Sawrkarin ruahmanna a siam ta hi Mizoram tan ni chhinchhiah tlak leh hriatreng tlak a ni a ti a, Kuthnathawktute chu mizahawmtak an ni tih sawiin ‘kuthnathawh’ hi ram changkangah chuan an hna ngaihsan ber a ni thin a, he rilru hi NLUP kaltlang hian Mizoramah kan thlen dik tir ve dawn a ni a ti a, ram leh hnam intodelhna tur atan leh hmasawnna atan kuthnathawh hi a pawimawh ber thu sawiin Mizoramah ngei pawh mipuiten kuthnathawh hi hna zahawm ber an tih leh sawi nuam an tih ber ala nih thuai dawn thu a sawi. Khuallian chuan NLUP kuthnathawktute hlawhtlinna hian kohhran leh khawtlang hmasawnna ah pawh a lawmawm zawngin nghawng a neih tan thu kohhran leh khawtlang hruaitute hnen atang a dawn thu a sawi a, a District zawnga thlirin, Serchhip District chu NLUP hnathawk tha ber ni a a hriat thu leh, NLUP First Phase beneficiary zinga hnathawk tha lo mi 16 an paih ngam te chu an thahnemngaihzia leh a hlawhtlin na tura an huaisen zia tilang tu ni a a hriat thu sawiin NLUP Line Departments te a fak bawk a ni. Pu Zira chuan kuthnathawktute chu fuihin sawrkarin sum leh pai tam taka a tanpui lai hian thahnemngai taka tha thawh ve turin a sawm a, Pathian tello chuan Mizoram leh mimal tin te hi kan dingchhuak zo dawn lo a ni tiin Pathian dahpawimawh ber zel turin a chah bawk.

Khuallian Pu R. Lalzirliana chuan District chhunga NLUP dawngtu hnathawk tha pathum thlan chhuahte hnehah lawmman tangka fai leh chawimawina thuziak a hlan nghal a. Lawmman dawngtute chu:

Pakhatna - R.Lalrualliana s/o Lungthanga, Biate, a trade thlan WRC-I (Agriculture Sector). Lawmman – Rs. 75,000 leh chawimawina thuziak (Citation)
Pahnihna - Lalchuana s/o Pabenga(L), N.Vanlaiphai, a trade thlan Ar vulh (AH&Vety Sector). Lawmman – Rs. 50,000 leh chawimawina thuziak (Citation)
Pathumna - Khawvelthangi d/o Zalaia(L), Serchhip-IV, a trade thlan Hmunphiah (Soil & WC Sector). Lawmman – Rs. 30,000 leh chawimawina thuziak (Citation)

Serchhip District chhung bika NLUP ti tha zual thlanchhuah khua pathum te chu : Pakhatna – Baktawng Tlangnuam khua (Tuikum Cluster Segment chhung ami), Pahnihna – Hmawngkawn khua (Tuikum Cluster Segment chhung ami), leh Biate khua (Hrangturzo Cluster Segment chhung ami) te an ni a, Baktawng Tlangnuam khua hi Mizoram puma ti tha ber khua a thlan an ni nghe nghe a ni.

Vawiin “Kuthnathawktute Ni” pual inkhawm hi Pu Lalsangliana, Addl. DC in a kaihruai a, Pu James Lalsiamliana, DAO, Serchhip in Report tawi pe in, AMFU leh Hnamchhantu Pawl aiawh ten thusawina hun an hmang a, zai mawi tak tak leh fiamthu hlimawm tak tak te ngaihthlak ho a nih hnu ah Pu Lalramliana Sailo, District Level Implementing Committee Member in lawmthu sawina hun hmangin a tin a ni.


Source: DIPR, Serchhip