PU JOSEPH LALHIMPUIA’N SERCHHIP DISTRICT EDUCATION COMMITTEE THUTKHAWM HMANPUI


Serchhip,13th August, 2014: Vawiin chawhma dar 11:00 khan Serchhip DC Meeting Room-ah Pu Joseph Lalhimpuia, Parliamentary Secretary, School Education etc., hovin Serchhip District Education Committee an thukhawm a, kum 2014-15 chhunga Serchhip District a SSA Mission leh RMSA Mission kalpuina tur atana PAB in Budget a ruahman sak te thlir ho anih bakah hmalakna tura hmachhawp te sawihova pawm nghal a ni bawk.

Pu Joseph Lalhimpuia chuan DEC meeting chhim theia a awm chu lawmawm a tih thu sawiin; District chhunga official te, tlawmngai pawl te leh khawtual mi challang te nen District chhunga Zirna tihhmasawnna atana tih ngai leh ngaihtuah ngaite zalen zawka sawiho tha a a hriat vanga District Education Committee member an nilo chung pawha DEC meeting rawn tel anih thu sawiin, a hmun ngeia kalchilh hian thil hriatfiah awlsam zawka a hriat vanga hetianga rawn tel ve hi ani a ti a, District tina DEC meetingah tel vek a tum thu a sawi bawk a ni.

Pu Mahima hian Budget mumal la awm rihlo mahse Education Department chuan theihtawp chhuahin hma a la mek reng tho ani tih sawiin DIET thuamchak nan thawktu mi 99 lak thar phalna Sawrkarin a pek tawh thu te, Higher Secondary School Lecturer post ruak 26 hnawhkhah phalna Sawrkarin a pek thu leh MPSC kaltlanga lak an nih tur thu te, Serchhip Higher Secondary School a Economics lecturer an neih loh avanga harsatna sutkian na turin heng Lecturer thar 26 zinga Economics lecturer pakhat chu pek an nih ngei tur thu a sawi bawk a, Private School hawn phalna tunhnaiah mi 18 hnenah pek an nih thu te leh Zirlaite tan taksa leh rilru hrisel bakah faina hi an zirlai hmasawn nan a pawimawhzia Sawrkarin a hriat thu te leh hemi kawnga hmalak dan tur mumal tak ruahmanna a siam mek thu te a sawi bawk a ni.

RMSA District Project Co-ordinator, Pu Zohmingthanga chuan kum 2013-14 chhungin Serchhip District RMSA Mission hnuaia hmalakna chi hrang hrang report pe in chung zingah chuan District chhunga Government Secondary School zawng zawng hnenah Annual School Grant Rs. 50,000/- theuh an pek thu te, Zirtirtu 219 tan “5 days In-service Teachers training” buatsaih anih thu te, Thenzawl, Chhingchhip, East Lungdar leh serchhip-ah “Community Training (SMDC)’ nihnih awh an buatsaih thu te, Zirlai zinga zirna kawnga hnufual zualte tan “Remedial Teaching” class Secondary School zawng zawnga buatsaih anih thu te, Rs. Nuaih 9.79 senga Governtnment Khumtung Democratic High School a Teachers’ Quarters sak anih thu te leh School dinglai thawmthat nan “Intervention of Strengthening of Existing Schools” hnuaiah Sawrkar School 15 thawmthat niin Rs. Nuaih 481.9 sen ral anih thu te a sawi a, kumin chhung (2014-15) hian Teachers Quarters 8 (East Lungdar-1, Bungtlang-4, Thinglian-3) sak tum anih thu te, Khawbel, Sialhau leh Buangpuiah Secondary School thar sak mek anih thu te, Government Secondary School 20 thlanchhuahte hnenah a Minor Repair Grant Rs. 25,000/- theuh pek an nih tur thu te, Government Secondary School 20 dang hnenah Annual School Grant Rs. 50,000/- theuh pek an nih tur thu te tarlan ani.

SSA District Project Co-ordinator, Pu C. Lalthanzira pawhin Serchhip District SSA Mission hmalakna tarlangin Serchhip District khaw tinah Primary School leh Middle School din kim vek anih thu a tarlang a, Sawrkar enkawl Primary leh Upper Primary School a zirlai enrolment tlahniam mek zel tih reh nan Serchhip District chhunga Middle School thlanchhuah pali chu Model School atan hmangin English medium a an kalpui chin thu leh heng School ah te hian naupang admission ti an pun thu a sawi a, hei hian rah duhawm a chhuah tan ni a an hriat thu leh tha lehzuala hmalakna kalpui tura ruahmanna siam an tum thu a sawi bawk a ni. Kumin chhung hian District chhunga Primary leh Upper Primary School 142 hnena Maintenance Grant pek an nih tur thu te, Primary School 74 leh Upper Primary School 68 hnena Annual School Grant pek an nih tur thu te tarlangin Zirtirtu Training na tur te, Zirlaite hnena Zirlaibu leh School Uniform a thlawna semna tura ruahmanna an siam chi hrang hrang te a tarlang bawk a ni.

Vawiin meeting kaihruaitu Pi Juhi Mukherjee, IAS, Serchhip District Education Committee Chairman, District Bawrhsap ni bawk pawhin Serchhip District chu India rama ziak leh chhiar thiam tamna ber District kan nih piah lamah chhawr tlak thiamna neih a pawimawh tel tih hriatreng a tul thu a sawi a, SDEO te chu bial an fan apiangin Maintenance Grant leh Annual Grant dawng School hrang hrangte chu uluk taka an sum hman dan endik thin turin a chah a ni.

Pu Joseph Lalhimpuia hian Rs. Nuaih 122 senga DEO leh SDEO Office sakna tur hmun Serchhip AOC Veng ami chu Engineer te nen tlawh nghalin an ruahmanna siam te a hmunah a enpui nghal a, chawhnu lamah Thenzawla Food testing laboratory leh ASIDE Scheme hnuaia hmun pawimawh te a tlawh nghal a ni.
 


Picture: Serchhip DEC Meeting with Pu Joseph Lalhimpuia, Parliamentary Secretary, Education Department

 


Picture: Serchhip DEC Meeting


Source: DIPR, Serchhip