HOME MINISTERIN SAINIK SCHOOL SAK MEK A TLAWH


Serchhip, 13th May, 2016 : Vawiin chhun dar 12 khan Chhingchhipa Sainik School tur sak mek chu Pu R. Lalzirliana, Home Minister chuan a hmuna kalin, hnathawh kal mekte a enfiah.

Minister chuan Chhingchhip khuain engmah phut let nei lova School sakna tur ram an pe chu lawmawm a tih thu a sawi a, he School sak mek hi a chhawr tangkai bertu tur an la nih thu sawiin khaw fing tak ni a ahriat thu a sawi bawk. Hnathawh kal mekah hnathawktute tana harsatna engmah siam lova, an lo tawiawi thin avangin lawmthu a hrilh a ni.

Kum thar 2017 school tan hun atang hian Sainik School hi kal tan pui tum a ni a, hetih hunah hian a hmunhmate a za vaia peih fel hman a ni dawn lova, amaherawhchu engemaw zat peih fel hman tum niin Pawl 6 zirlai tur mi 60 lak phawt tum a nih thu a sawi bawk.

Hnathawk mekte tha taka leh chak taka kalpui a nih theih nana hmalak dan te sawiin a hun taka hna hi zawh hman ngei a tul thu leh department hrang hrangte pawh an hnathawh turte theihtawp chhhuaha bawhzui nghal turin a chah bawk a. School sak mekte hi tlawh kualin, a sak dan phung leh hna an thawh danah lungawi thlak a ti hle a ni.

Home Minister hi Col. Z.S. Zuala, Parliamentary Secretary, Pi Renu Sharma, Secretary, Home Deparment leh sawrkar mi pawimawh tak tak ten an tawiawm a. Sawrkar Department hotu te hian hna an thawhna kawnga an hmalakna te leh hmachhawpte Minister hi hrilhin Electrict eng pekna tur atana sum ruahman cheng nuai 97.66 hmanga Chhingchhip Power Sub-Station atanga pek a nih tur thu te, PHE Department in cheng Vaibelchhe 7.8 hmanga Phaisen lui atanga tui pump chhuak tura ruahmana a awm thu te sawiin, tun dinhmunah chuan tui lak hi an harsatna ber ni a lang a ni rih a ni.

Home Minister hi Serchhip atangin Dr. Lalrozama, IAS, DC Serchhip leh Pu Lalringdika, MPS, SP Serchhip te pawhin an tawiawm bawk a ni.

Source: DIPR, Serchhip