SERCHHIP-AH MEGA MOCK-DRILL HLAWHTLING TAK NEIH A NI


Serchhip, 13th March, 2014: National Disaster Management Authority ruahmanna angin India hmarchhak State dang te rualin chhiatrupna lo thlen huna chhanchhuahna hna thawh dan tur lem chan “Mega Mock-Drill” chu vawiin khan Serchhip ah hlawhtling taka neih a ni.

Mega-Mock Drill hi Serchhip khawpui huam chhunga hmun hmun nga (Serchhip Bazar Building, J.N.Hospital, Sesah Residential Area, New Serchhip Supply Godown leh a chheh vel, DC Office Complex) ah te neih a ni a, Relief Camp atan New Serchhip YMA Hall leh a chhehvel hman a ni bawk.

Mega-Mock Drill vawiina neih hi kum 1897 a Shillong khawpui lirnghing na tak (8.7 Richter Scale) in a sawi ang tluk a na in Serchhip a sawi ve thulh a chet lak dan zirna a ni a, chawhma dar 11:30 ah Siren tih rik niin Mock-Drill hi tan a ni a, National Disaster Response Force, State Disaster Response Force, Mizoram Police, 14 Assam Rifles, Sawrkar Department hrang hrang leh Volunteers engemawzatin chhanchhuah hna hi an thawk a, hmanraw chi hrang hrang leh lirthei engemawzat chhanchhuah hna thawh na atan hian hman a ni bawk.

Mock Drill neih zawh hian DC Conference Hall-ah Dr. Jayakumar C, Senior Consultant, NDMA hovin observer leh official hrang hrangte Final briefing neih a ni a, Mock-Drill atanga zir tur an hmuh thar te leh hmasawnna tur chi hrang hrang te, induhkhawplohna chi hrang hrang te an sawiho a; Dr. Jayakumar chuan Mock-Drill chu hlawhtling thawkhata a hriat thu leh Mock-Drill a tel zawng zawngte inpekna a hmuhin lawm awm a tih thu a sawi a, Chhiatrupna a lo thlena pawimawh ber pakhat chu pawn lam atanga puihna a lo thlen hma a kan hmanraw neih ang ang tangkai taka hman thiam anih thu sawiin kan hmanraw neih te duhthusam a nilo emaw, a sit awm deuh anih pawhin hman tangkai dan tur zir thiam a pawimawh hle a ni a ti a, Relief Camp a Psycho-Social Councelling leh Trauma Councelling atana ruahmanna siam a ni leh hemi atana Child Protection Unit an telh chu hmun danga a la hmuh ngai loh anih thu leh entawntlak a tih thu a sawi lang bawk.

Mega Mock-Drill hi Mozoram chhim lam District pali - Serchhip, Lunglei, Lawngtlai leh saiha tan a ruahman a ni a, heng District hrang hrang atang te hian Observer engemaw zat an tel a, National Disaster Management Authority, State Disaster Management Authority bakah National Disaster Response Team te, 5th IR Batallion Lunglei atang State Disaster Response Team te, Mizoram Police, 14 Assam Rifles, Sawrkar Department hrang hrang bakah Volunteers 100 chuang an tel a ni.

Source: DIPR, Serchhip