SERCHHIP DISTRICT BAWRHSAP HO IN SERCHHIP KHAWPUIIN HARSATNA A TAWH CHUNG CHANG SAWI HO


Serchhip: 13th March, 2013: “Tui Renchem Turin Mipuite Ka Ngen Tak Meuh a ni”- District Bawrhsap

Vawiin khan Serchhip Bawrhsap Pi Juhi Mukherjee IAS hovin Serchhip khawtlang hruaitute leh Sawrkar official ten DC Office Chamber ah tunlaia Serchhip khawpuiin tui harsatna a tawh chungchang an sawi ho.

Vawiin thutkhawmah hian Er. Lalhruaia, E.E., Serchhip WATSAN Division, PHED chuan Serchhip khawpui hman tur tui pump na atana an hman ber I.O.C Veng a Booster Pump a Diesel Engine la that loh vang leh Electrict Current hmanga tui pump turin Power Supply an mamawh zat an hmuh theih loh vangin tui pump chhuah theih zat a tlem em em a, hei hi harsatna an tawh chhan ber anih thu a sawi a, siam tha tura theitawp an chhuah reng thu sawiin, Power Supply chungchangah P&E Department in theihtawp chhuaha an ngaihpawimawh sak thu a sawi bawk.

Er. J.H.Malsawma, E.E., P&E Department pawhin PHE in tui an pump theih nan theihtawp an chhuah pui thu leh an ngaihpawimawh ber te zinga an dah thu a sawi a, tunlai a Mizoram puma power supply dinhmun tha lovin Serchhip pawh a nghawng ve avangin an duh angin hma an lak pui thei bik lo a ni tih sawiin, mipuite’n an harsatna hriatthiampui se a duh thu a sawi bawk.

Zawhna chhangin Er. Lalhruaia chuan tun a I.O.C Booster Pump hi Kirloskar Company siam niin kum 1997 atanga hman tan tawh a ni a, khawl hi a hlui tawh avangin leh a siam tu Company in hetiang hi an siam chhuah tawh loh avangin a part lei tur a vang hle a ni a ti a, Kolkata leh Pune thlengin an zawn kual thu leh tunah hian an zawn hmuh theih thuai a beisei thu sawiin karleh tawp lamah tal khawl siam tha hman tura a part mamawh hi zawn hmuh ngei a tum thu a sawi bawk.

Booster Pump thar leh tha zawk neih anih theih na tura hma lak tula an hriat thu khawtlang hruaitute sawi chu chhangin District Bawrhsap chuan theihtawp chhuaha hma lak a tum thu a sawi a, Bawrhsap chuan mipuite chu tui harsatna an tawh mek chhan hrethiam tur leh tun dinhmunah chuan tui an hmuh ang ang renchem taka hmang turin a ngen tak meuh a ni tih a sawi a, PHED lam pawhin tui sem chungchangah rualkhai taka sem anih theih nan uluk leh taima lehzuala an tuisem te vil turin thawktute in chah nawn leh an tum thu an sawi bawk.

Vawiin thutkhawmah hian E.E.,(PHED), E.E.,(P&E), Additional D.C., SDO(Sadar), Serchhip khawchhung V.C. awiawhte, Sub-Headquarters Y.M.A aiawh te leh Consumer Union aiawh te an tel a ni.

Source: DIPR, Serchhip