ELECTORAL ROLL OBSERVER-IN SERCHHIP TLAWH


Serchhip, 13th January, 2015: Vawiin chawhnu khan Pu Zothankhuma, IAS, Electoral Roll Observer, Serchhip District chuan Serchhip District-a Electoral Roll Special Summary Revision a rawn enfiah a, chawhnu dar 1:00 khan Serchhip District Additional DC Pu VL Remliana, MCS pisa ah official pawimawhte nen inkawmhona hun an hmang.

Pu Zothankhuma chuan Serchhip District chhunga Electoral Roll Special Summary Revision kalpui dan chu felfai a tih thu leh lawmawm a tih thu a sawi a, Electoral Roll buatsaih fimkhur a tul zia officialte hrilh nawn in harsatna lian tham awm lova tluang taka an zo fel thei chu thil lawmawm tak anih thu a sawi a ni. Foreigner te chungchang sawilangin Pu Zothankhuma chuan mi tu pawh India ram chhunga piang an nih chuan an nu leh pa te Foreigner pawh nise anmahni chu “Citizen by Birth” an nih avangin India khua leh tui dik tak an ni a ti a, India rama awm nghet tawh India khua leh tui ni duh chuan Dan kaltlangin India khua leh tui nihna an dil theih thu a sawi bawk.

Pu Lalhmansanga, MCS, Election Officer, Serchhip District chuan Electoral Roll chu a hun taka tarchhuak turin engkim peihfel vek anih tawh thu a sawi a, Officialte, NGO te leh mipuite thawhhona tha tak avangin tluang tak leh harsatna lian tham awm lova hna an thawh theih thu sawiin lawmthu a sawi bawk a ni.

Final Electoral Roll kimchang hi January ni 15, 2015 ah mipui vantlang en theih turin tarchhuah a ni ang a, District chhunga Polling Station zawng zawng Booth Level Officer (BLO) theuh te hnenah a copy pek niin an hnen atang a en theih bawk dawn a, ARO leh AERO zawng zawng hnen atang a en theih bawk ang.

Source: DIPR, Serchhip