SOCIAL WELFARE MINISTER-IN GOVT. SERCHHIP COLLEGE WEEK KHARNA HMANPUI


Serchhip, 12th September, 2014: Govt. Serchhip College chuan vawiin khan an campus a H.D. Rosanga Multipurpose Hall-ah College Week kharna hun an hmang a. Social Welfare Minister Pu PC Lalthanliana’n khuallian niin he hun hi a hmanpui.

Khuallian Pu PC Lalthanliana chuan zirlai kalkhawmte hmaah thusawiin tunlaiah lehkhathiam, thiam ziktluak silo kan tam tawh a, hetiang renga kan kal chuan thangkhat lian han ral leh se ram leh hnam tana hnawksak lehkhathiam kan tam ang a, helna leh kawhmawh bawlna chi hrang hrang a chhuah palh mai a hlauhawm dawn a a hriat thu a sawi a, thiamna hman tlak leh chhawr tlak nei tura zirlaite chu fuihin hemi tur chuan mahni inhriatchian phawt a tumna leh duhthlanna fel tak nen lehkha zir a pawimawh a ni tiin mi nih ang leh tih ang tih vet um naran ringawt hi a dik tawk lova, eng nge paltlang ngai a eng tianga tawrh nge ngai tih te hriatchian hmasak phawt zel a pawimawh a ni tiin hmalam hun atana ruahmanna mumal tak nei turin zirlaite a fuih a, mihringte hi hlawhchham thei kan nih avangin hetiang hun a lo thlen pawha hlawhtlinna rahbi tuk nana hmang thiam tura rilru siam thar turin a fuih bawk.

Khuallian hian Serchhip Govt. College Basketball Court sak lai sum indaihlohna avanga an chawlhsan tak sak zawh anih theih nan tangka fai Rs. Nuaih khat (1,00,000/-) a pek tur thu College zirlai leh zirtirtu kalkhawmte a hrilh a ni.

Serchhip Govt. College Week hi September 1, 2014 – September 8, 2014 inkara neih a ni a, Indoor Games discipline 21 leh Outdoor Games discipline 19 ah zirlaite an in el a, zirlaite hi House hrang hrang pali ah in thenin Green House chu overall champion an ni a, Best Athlete (Mipa) ah V. Laldinpuia 4th Semester B.Sc. zirlai leh Best Athlete (Hmeichhia) ah Lalthazuali, 4th Semester B.Sc. zirlaite thlan niin Khuallian nupui Pi ZD Lalnunziri’n lawmman hi a hlan a ni.

Vawiin College Week kharna hun hi session hnihah then a ni a. Chawhma lamah klhuallian hovin inkhawm a ni a, chawhnu lamah variety programme hman ni in tlaiah ruai ropui takin an theh a ni.

Govt. Serchhip College lungphum hi kum 1973 August ni 25 khan khatih laia Mizoram Chief Minister Pu Ch.Chhunga’n a lo phum tawh a, November ni 1, 1984 ah Deficit a hlankai niin August 25, 1989 ah provincialised a ni a, January ni 8, 2011 ah UGC Grade B Accreditation an hmu bawk. Tun dinhmunah Arts, Science leh BCA zir theih a ni a, College din tirh atanga tun thlengin B.A. pass chhuak 762, B.Sc. pass chhuak 42 leh BCA zo tawh 56, avaiin Graduate 860 an chherchhuak tawh a kuminah hian zirlai 389 (BA-301, B.Sc-73, BCA-15) an awm mek a ni.

Source: DIPR, Serchhip