HORTICULTURE DEPARTMENT IN HRANGTURZO BIAL-AH NLUP SEM


Serchhip, 12th August, 2015 : Serchhip a Horticulture Department chuan vawiin khan Thangburha Hall, East Lungdar-ah Hrangturzo Cluster huamchhunga NLUP 2nd Phase tanpuina dawngtute hnenah final Installment an sem a, Khuallian atan Hrangturzo Bialtu MLA Pi Vanlalawmpuii Chawngthu hman a ni.

NLUP beneficiaryte fuihna thusawiin khuallian Pi Vanlalawmpuii Chawngthu chuan NLUP tanpuina dawngtute hian lawmna chang kan hriat takzet a pawimawh a, thinlung taka lawm chuan hlawhchham aduh a rinawm loh a nia ti a, unau pianpui pawh pawisa tam thama in tanpui a harsat laia hetiang khawpa kuthnathawktute ngaihsaktu Sawrkar chungah lawmthu kan sawi a ni a ti. Pi Awmpuii chuan NLUP hlawhtlinna tur bulpui chu dik tak leh rinawm taka tanpuina sum an dawn te an hman chu ani a ti a, beneficiary te chu tanpuina sum an dawn tur ang an dawn kim tawh avangin tunah huan an hlawhtlin leh hlawhtlin loh ah teh an ni tawh dawn a ni a ti a, a bial mipuite NLUP a an hlawhtlinna hi MLA bial dang ami te awh leh entawn tlak anih a beisei thu sawiin theihtawp chhuah a tan la turin a ngen a ni.

Khuallian chuan Village Council member thar te pawh fuihin NLUP chungchanga an thawh tur te dik taka thawk turin a chah a, party emaw chhungkua emaw ni lova khawtlang hmasawnna dahpawimawh hmasa ber turin a hrilh a, khaw lal ni tura thlan ni lovin mipuite rawngbawl tur leh khawtlang tana hnathawk tura thlan an ni tih in hre reng tur leh langtlang, belhchian dawl VC nei turin a chah a ni.

Hrangturzo Cluster a Horticulture Department kaltlanga NLUP 2nd Phase tanpuina final installment vawiin a dawngtu hi mi 277 an ni a, hengte hi East Lungdar ah Serthlum Trade thlangtu 106, Biate ah Serthlum Trade thlang tu 51 leh Thingpui Trade thlangtu 36, Sailulak ah Serthlum Trade thlangtu 29, Leng ah Serthlum Trade thlangtu 26 leh Mualcheng khua a Serthlum Trade thlangtu 29 te an ni.

Serthlum Trade thlangtu te hian Rs. 37,500/- theuh dawngin a vaia sem zat hi Rs. 89,98820/- a ni a, Thingpui Trade thlangtu te hian Rs. 3000/- theuh dawngin a vaia sem zat hi Rs. 1,08,000/- niin vawiina tanpuina sum sem zawng zawng hi Rs. 91,06,820/- a nia, beneficiary ten Actual Payee Receipt an sign hnu ah an bank account ah pawisa hi dah sak an ni.

NLUP 2nd Phase final Instalment hi nimin khan North Vanlaiphai ah North Vanlaiphai, Bawktlang, Lungchhuan leh Lungkawlh khua a NLUP 2nd Phase beneficiary 118 (M.Orange - 108, Grape – 10) hnenah sem a lo ni tawh bawk a ni.

Pi Zosiamliani, DHO, Serchhipin NLUP sem inkhawm hi kaihruaiin Pi C. Laltleipuii, MCS, BDO, East Lungdar leh Pu Andrew H Lalremruata, MIS, Media Officer, NLUP Serchhip District ten an telpui a ni.

Source: DIPR, Serchhip