GOVERNMENT FISH SEED FARM,THENZAWL AH SANGHA CHI HRALH CHHUAH A NI


Dated Serchhip, the 12th July, 2017: Tukin zing dar 6:30 atang khan Sangha dil neitu leh mamawhte tan Government Fish Seed Farm,Thenzawl atangin sangha chi engemaw zat hralh chhuah a ni.

He hun hi Pu Thlamuana,MCS Secretary, Fisheries Department chuan a hmanpui a, Farm hmunhma leh hmalaknate leh hnathawhte a enpui nghal bawk. Government Fish Seed Farm, Thenzawl hi 7.87 Ha. a zau niin Sangha dil Stocking Pond – 2, Rearing Pond – 7 leh Nursery Pond – 8 a awm a. Ni 11 September, 2008 atang khan ZOFISHFED in enkawlin ni 23 July, 2014 atangin Fisheries Department hian an enkawl chhunzawm ve leh ta a ni. Department-in an enkawl hnu 2015-2016 chhung khan Sangha chi Nuaih li, sing hnih leh sang khat (4.22 lakhs) an thar chhuah bakah 2016-2017 chhung hian Sangha chi Nuaih thum, Sing thum leh sang nga (3.35 lakhs) thar chhuak tawhin heng an sangha chi hralhna te hi sawrkar Revenue ah an chhung lut thin a ni.

Heng bakah hian Fisheries Department in Thenzawl a Vantawng Group YMA te enkawl tura Community Fish Pond an siam sakah Pu Thlamuana, Secreatary Fisheries Department chuan Sangha chi a chhuah a. He sangha chi chhuah inkhawm tawi neih ah hian Pu Thlamuana chuan thusawiin, YMA chu Ram leh Hnam humhalhtu annih thu leh Luidung nungcha man tur awm tawh lo te nasa taka an humhalh avanga kan luidungahte Sangha leh nungchate hmuh tur awm an awm leh ta chu lawmawm a tih thu sawiin, Vantawng Group YMA te chu nasa lehzual a tan la turin a fuih bawk.

Thusawitu dang Pi Zonuntluangi, DFDO Serchhip District chuan, Community Fish Pond chu tangkai taka hman anih theih dan tur leh Thenzawl hi kum 10 liamtaah kha chuan Sangha khawi kawnga hmahruaitu langsar tak an ni thin a, tun hnuah erawh chuan sangha khawi kawngah nasa takin an tlakhniam tak avangin nasa leh zuala tan lak an ngaihthu a sawi. Vantawng Group YMA ten Community Fish Pond an enkawl turah hian hlawkna nasa tak an neih theih nan duhsakna a hlan bakah Thenzawl khua pawhin nasa leh zuala Sangha khawi kawngah tan an lak leh zual theihna tur anih a beisei thu a sawi bawk a ni.

Community Fish Pond hi NFDB (National Fisheries Development Board) atanga sum hmuh hmanga siam niin, a siam hna hi Department in a khawih a, Vantawng Group YMA ten an enkawl dawn a ni.

He huna Sangha chi chhuahte hi Government Fish Seed Farm, Thenzawl atanga an thar chhuah a ni a, Sangha dil atanga an thar chhuah hlawkna te pawh hi Vantawng Group YMA in an tel dawn a ni.

Source: DIPR, Serchhip