SERCHHIP-AH INDEPENDENCE DAY 2012 HMAN DAN TUR REL


Serchhip: 12th July, 2012: Vawiin chawhma dar 11 khan Serchhip DC’s Meeting Hall-ah kumin August ni 15-a Independence Day Serchhip-a lawm dan tur rel a ni a. Serchhip a sawrkar Department hrang hrang hotute, Village Council leh tlawmngai pawl hrang hrang aiawhte an tel tha hle a ni.

Meeting hi District Bawrhsap Pu P.Lalchhuanga’n kaihruaiin kumin Independence Day lawmna inkhawm hi Khawtetlang khelmual, New Serchhip ah August ni 15, zing dar 10:30 ah tan tura ruahman a ni a, khuallian chu Sawrkarin a ruat tur anih avangin sawrkar ruahman dan ngaihchan tur a ni a, kum danga tih thin ang bawkin Independence Day Parade neih leh tura tih a ni bawk a, hetah hian Armed Contingent 2(Police & 14 Assam Rifles) leh Un-armed Contingent 21 tel thei tura beisei an ni a. Parade hi endiktu siama a ti thate hnenah lawmman sem tur a ni ang. Hemi ni vek hian Serchhip District chhung atanga naupang huaisen lawmman Sawrkar Laipui siam (Jeevan Raksha Pradhak) dawngtu Lalpuihzuali, Baktawng Tlangnuam hnenah chawimawina hlan nghal a ni bawk ang. Independence Day lawmna a kal duh mipuite tan a thlawna hman turin Bus service tir a ni dawn a, hei hi DC in ruahmanna a siam dawn a ni.

Meeting-ah hian Independence Day lawmna atana thil pawimawh chi hrang hrang– Electric Power Supply, tui thianghlim in tur, First Aid, Pavillion siam leh chei dan tur te, Field chei dan tur te uluk taka ruahman niin, mawhphurhna Department hrang hrang te leh tlawmngai pawl hrang hrangte hnenah sem rual a ni a, Independence Day zing karah Serchhip-a JNM Hospital a damlo te, Zoar Children’s Home, Orphanage Home leh Shalom Special School te bakah Chhiahtlanga Adult Rehabilitation Centre (ARC) te tlawha thilpek hlan tum a ni bawk.

Independence Day ah hian chhun dar 12:00 ah D.C Bungalow, Khawtetlangah ‘D.C’s at Home’ neih tura ruahman a ni.

Bawrhsap chuan sawrkar hnathawkte chu he ni hi ngaipawimawh tura chahin India ram puanzar (National Flag) chu Deptt. tin ten a tarna hmun turah zing ni chhuah rual atar vek tur leh ni tlak hma a seng leh vek turin a chah bawk.

Independence Day lawmna atana Department hrang hrangte inbuatsaihna hi August ni 10, 2012 ah thlir ho leh tura ruahmanna siam nghal a ni bawk.



Source: DIPR, Serchhip