UN MISSION TECHNICAL TEAM THENZAWL AH


Serchhip, 12th May, 2014: UN Mission Technical Team member, Pu Sandeep Tandon (UNIDO), Ms Manjula Bhyan (UNIDO), Ms Antonia Paliwal (FAO), Ms Kalpana Tawakley (UNDP), leh Pu Sanjeev Kumar Gupta (UNDP) te chuan nimin khan Thenzawl a AH&Vety Department ten ran chaw an chinna hmun (Fodder Farm) leh Puantah a eizawng te an tlawh.

UN Mission Technical Team te hian Thenzawla AH&Vety Fodder Farm acre 690 a zau hi ruahsur hnuaiah tlawhin anmahni lo dawngsawngtu Vety Department official te hnenah ran chaw an chin dan te leh thil dang tam tak chipchiar takin an zawt a, kawngpui kama ran chaw chinna hmun zau tak siam ani chu ram tha lai anih avangin uihawm an tih thu an sawi a, ngaihtuahna thar hman a hmun danga sawn dan awm se tha a an hriat thu te, kawng kam chu mawi taka chei a mikhual hip nan leh thildang tangkai zawk atana hman nise tha hle a an hriat thu te an sawi a, square metre khata ran chaw an thar chhuah dan leh a hlawk dan te kimchang taka record siam a vawn that nise tha a an hriat thu te leh hma lak dawn reng rengin uluk taka zirchian hmasak a a thawk tur te pawh mumal taka training pek thin a pawimawhzia an sawi uar hle a ni.


Picture: UN Mission Team @ Thenzawl

UN Mission Team te hian Thenzawl khawchhunga Handloom neitute leh puan tah tute bakah an hralhchhuahna dawr te an tlawh nghal bawk a, puantahtute chuan harsatna chi hrang hrang an tawh te lo hrilhin la chungchangah harsatna an tawh zeuh zeuh thu te, abik takin an rawng duh ang te hmuh zung zung a harsat chang a awm thu te pawh an lo hrilh a, an puan tah te India ramchhung leh pawn hmun hrang hrang a hralh chhuah ani thin tih an hriat chuan an phurpui hle a, an hmasawnna tur ngaihtuahpui an duh thu te leh Sawrkar thuneitute hnena thlensak an tum thu te an sawi a ni.


Picture: UN Mission Team at a local handloom site in Thenzawl


Picture: UN Mission Team at a local handloom site in Thenzawl

Ruahsur nasat avanga kawng dinhmunin azir loh avangin UN Mission Technical Team te hian tlawh tura an ruahman Thenzawla PIGFED ho Vawk vulhna hmunpui leh Sailam khua a YMA Reserved Forest te an tlawh thei lova, Hmuifang Tlanga Tourist Resort tlawh thungin ngaw dur tha tak tak Mizoramin a la nei chu lawmawm an tihzia an sawi a; Mizoram chu ram nuam leh mawi tak, abik takin Eco-Tourism leh Adventure Tourism lama hmakhaw eng tak ni a an hriat thu te leh helama tan lak hi a pawimawha an hriat thu an sawi bawk a ni.

UN Mission Technical Team te hi Dr. Robert Rualthankhuma, Project Coordinator, NLUP Implementing Board leh Andrew H.Lalremruata, MIS, Media Officer, NLUP, Serchhip District ten an tawiawm a ni.

Source: DIPR, Serchhip