VANDUAINA TAWKTUTE HNENAH ZANGNADAWMNA HLAN A NI


Dated Serchhip, the 12th April, 2017: Vawiin chhun dar 12:00 hian District Court Conference Hall, Serchhipah District Legal Services Authority hmalaknain ‘The Mizoram Victims of Crime Compensation (Amendment) Scheme, 2016’ hnuaiah Serchhip District chhunga vanduaina tawktute hnenah zangnadawmna pek an ni.

Pi R. Lalduhawmi, MJS, Senior Civil Judge chuan thusawiin Dan hriat loh hi chhuanlam a tling lova, a hria ten zirtirna an pek hi ngaihpawimawh nachang kan hriat hi a tul ani a ti. Hmingchhiat kan hlauh avanga pawi khawihtu ngaihdam mai kan ching hi a pawi hle a, hei hian pawikhawihtute a ti huangtau ani tih hria in, thuneitute chinfel tura hrilh hriat ngei hi mipuite chanvo ani tih hi kan hriat thar a tul a ni a ti bawk. Naupang chunga hleilenna thleng thinah nu leh pate mawhphurhna a sang hle a, kan fate kan enkawl danah pawh fimkhura kan fate khawiah nge an awm a, an him em tih hi kan ngaihven reng a tul a ni a ti. Vawiina vanduaina tawktuten zangnadawna an dawn hian an vanduaina kha a tidam ta tihna a ni lova, engemaw chenah a chhawk zangkhai ang tih erawh kan beisei a, chuvang chuan vanduaina tawk kan awm reng rengin thuneitute hnenah a rang lama hrilhhriat thuai hian zangnadawmna dawn kawngah pawh kawngro a su a ni a ti a ni.

Pu Lalringdika, SP Serchhip pawhin thu sawiin, mitinin kan dikna chanvo kan hriat hi ram changkang zia a ni a, Mizoramah pawh dan hriatna lamah hma kan sawn tawh hle a ni, a ti a. Mizoramah naupang khuaikhem thubuai tam ta riau anga a lan chhan pawh hi Mizote kan sual tak thut vang pawh ni lovin, kan dikna chanvo hria kan tam chhoh ve tak zel vang a ni, a ti. Pu Lalringdika chuan, tuna misual leh mi pangngai lo anga vantlangin an hmuh tam takte hi an naupan laia harsatna tawk an ni fova, chuvang chuan nu leh paten kan fate kan enkawlna ah tan kan lak lehzual a tul hle a ni a ti. Thil sual ti tute kan report hi inhekna a ni lova, thuneitute kan tanpuina zawk a ni tih hriain, misual report hreh lovang u, a ti bawk.

Vawiinah hian Serchhip District chhunga pawikhawihna/sualna avanga vanduaina tawktu mi 5 hnenah hian zangnadawmna Rs. 14,00,000. (Nuai 14) hlan an ni a. Serchhip District chhungah hian he Scheme hnuai atang hian mi 10 hnenah zangnadawmna hi pek tawh niin, Rs. 19,20,000 (Nuai 19 leh sing 2) sem chhuah tawh a ni.

He hun hi Pi R. Lalduhawmi. MJS Senior Civil Judge chuan a kaihruai a, Nominated member te leh zangnadawmna dawngtu tur chhungte an tel bawk a ni.

Source: DIPR, Serchhip