CHIEF INFORMATION COMMISSIONER HOVIN EAST LUNGDAR AH RTI CHUNGCHANG IN ZIRTIR A NI


Serchhip, 12th April, 2016 : Mizoram Information Commission leh Tuichangral Zirlai Pawl (TCZP) tangkawp buatsaihin vawiin chawhnu dar 1:00 khan Thangburha Hall, East Lungdar ah RTI chungchang inzirtirna/Awareness Campaign leh zirlaite fuihna hun buatsaih a ni a, Pu Lal Dingliana, IFS (rtd), Chief Information Commissioner chu khuallian niin East Lungdara Zirna In hrang hrang a zirlaite leh zirtirtute bakah tlawmngai pawl hrang hrang aiawhte, khawtlang hruaitute an tel a ni.

Chief Information Commissioner chuan Tuichangral Zirlai Pawl hruaituten hetiang programme ngaihtuah chhuah nachang an hria chu fakawm a tih thu sawiin zirlai pawl leh tlawmngai pawl dangte pawhin entawn atan a tha hle a ni a ti a, Right to Information chu langtlang sawrkar siamtu, hmasawnna thlentu anih theih bakah corruption venna hmanrua tha tak a ni a, rinawmna leh huaisenna min petu, dikna tantu a nih vangin mipuite pawhin kan ngaihven a kan hman tangkai hi tihmakmawh ani a ti bawk. RTI chu hlauh tur ani lova, midang hekna anih loh bakah thil diklo haichhuahna hmanrua ani a, thil diklo vengtu a ni a ti bawk. Zirlai kalkhawmte fuihna thu sawiin Chief Infirmation Commissioner chuan tumruhna nen engkim a tih theih a ni a ti a, Pathianin thluak min pek theuh hi kan hman that a, dik taka kan hman phawt chuan hlawhtlinpuina tham min pe vek a ni tiin Pathian malsawmna dawng tur chuan tih ve tur kan nei a, nun uluk leh rilru thianghlim put a theihtawp chhuah a ngai a ni a ti bawk.

Vawiin RTI inzirtirna inkhawm hi Pu Lalhmangzuala, President, TCZP in a kaihruai a, Pu Lalthawhsaka Fanai, General Secretary, TCZP in report pe in inlawmna thu a sawi a, East Lungdar khawchhunga Primary School, Middle School, High School leh Higher Secondary School zirlai 300 chuang leh zirtirtu 40 vel an tel a ni.

Chief Information Commissioner hi Pu Vanlalngena, MCS, Secretary, Mizoram Information Commission, Pu Andrew H Lalremruata, MIS, DIPRO, Serchhip leh Pi C.Laltleipuii, MCS, BDO, East Lungdar ten an tawiawm a, zaninah East Lungdarah riakin naktukah Biate ah RTI Awareness Campaign an neih chhunzawm ang.

Source: DIPR, Serchhip