HEALTH MINISTER PU LAL THANZARA HOVIN SERCHHIP-AH NLUP TUAI THAR LEHNA “NLUP REVITALISATION PROGRAMME” HMAN A NI


Serchhip, 12th March, 2015: Vawiin chawhma dar 10:00 khan Serchhip DC’s Conference hall-ah NLUP tuai thar lehna “NLUP Revitalisation Programme” hman a ni a, Health & Family Welfare Minister Pu Lal Thanzara chuan khuallian niin he hun hi a hmanpui a, Serchhip a Sawrkar Pisa hrang hrang hotute, NLUP Line Departments aiawhte, Chanchinbumite leh NLUP 3rd & 4th Phase beneficiary te, District-Level NLUP Committee member te an kal tha hle a ni.

Mipui pungkhawm hma ah thu sawiin Pu Lal Thanzara chuan NLUP chu Pathian malsawmna dawng programme anih avangin a hlawhtlinna kan hmu tan zel a, Chief Minister Pu Lal Thanhawlan Mizoram dung leh vang a fan kualna ah pawh NLUP hlawhtlinpuitu ten an thawh rah an lo hlui thin a, vawiina hun pawimawh tak hman mekah pawh a NLUP 1st Phase hlawhtlinpuitu ten an chanchin an sawi chuan a rilru a hneh thu leh thinlung taka a lawmpui thu sawiin NLUP 3rd leh 4th Phase beneficiary te pawhin mihlawhtlingte thu leh hla atanga chona thar leh tumruhna thar an neih ngei a duhsak thu a sawi bawk a ni.

Pu Lal Thanzara chuan NLUP chu langtlang leh diktaka kalpui anih a, tanpuina sum pawh Bank kaltlang deuh veka sem anih mek lain mi thenkhatin tihtawp anih theih nan Sawrkar laipui lamah an hek a, mahse NLUP hotuten thil awmzia an sawifiah hnu ah rang takin NLUP sum an rawn pe chhuak leh ta a, heng thil avang hian 3rd leh 4th Phase beneficiary te hnenah tum aia tlaia tanpuina sum pekchhuah a nghaih phah ta a ni a ti a, tunah erawh tanpuina sum hi Mizoram sawrkar kutah a awm tawh avangin semchhuah thuai tur anih thu leh Line Department thenkhat phei chuan vawiinah an sem theih dawn thu a sawi bawk a ni. NLUP chuan Pathian malsawmna a dawn avangin ram pawn atanga ngaihven a hlawh a, Mizoram thenawm State Manipur, Arunachal Pradesh leh Nagaland atang pawhin an rawn zirchiang tawh a, hei bakah hian United Nations Organisation hnuai Agency lian ber ber ten NLUP thiltum te tihchak lehzual anih theih nan Mizoram Sawrkar thawhpui an duh a, Aizawlah an thuthmun tur ngaihtuah mek a ni a ti a, South Korea palai pawhin an inphal thu a sawi a, tunah hian Tata Trust nen tun thla chhung ngeia MoU ziahfel tum a ni a, an hnen atang hian cheng vaibelchhe 18 lai hmuh a ni dawn a ni a ti bawk.

NLUP tuai thar lehna programme ah hian Line Department hrang hrang pariat hnuaia beneficiary hlawhtling ten an hlawhtlin dan chanchin ngaihnawm tak tak an report a, Horticulture Department hnuaia 3rd Phase beneficiary 10 hnenah Khuallianin tanpuina tangka first installment Rs. 10,000/- theuh a hlan a, beneficiary dan 34 te account ah pawh pawisa hi dah a ni a, karleh lamah Horticulture Department hnuaia 3rd & 4th Phase beneficiar te tanpuina dawn tur first installment chu Bank kaltlanga pek vek an nih tur thu Pu Lalhmangaiha, DHO in a sawi a ni.

Vawiin NLUP tuai thar lehna programme hi District Bawrhsap Pi Juhi Mukherjee, IAS in Mizo Tawngin a kaihruai a, Pu VL Remliana, MCS, Addl. DC in report pe in; NLUP 3rd & 4th Phase beneficiary ten Pu James Lalsiamliana, DAO kaihhruaina in NLUP tanpuina dik taka hmang tura thutiam an sawi rual a, Pu Lalramliana Sailo, Member, DLNC in lawmthu sawiin hnu a khar a ni.

Source: DIPR, Serchhip