HORTICULTURE MINISTER-IN SERCHHIP ZAWLPUI PHAIA THLASIK THLAI CHINGTUTE TLAWH


Serchhip, 12th February, 2016 : Horticulture Minister Pu PC Lalthanliana chuan vawiin khan Serchhip Zawlpui phai tlawhin thlasik thlai chingtute a kawm a, an hmalakna te a hmunah ngei kala enpuiin harsatna an tawh hrang hrangte sutkian dan tur a ngaihtuah dan tur a sawipui.

Pu Mathana chuan thlasik thlai chingtute hnathawh dan a hmuh chuan an fakawm a tih thu sawiin bialtu MLA, Mizoram Chief Minister Pu Lal Thanhawla'n Zawlpui phai panna kawng tha taka a sial sak bakah electric current a lakluh sak bawk chu thil lawmawm tak ani tiin a tangkai thei ang bera chhawr turin leilet neitute chu a hrilh a; Leilet neituten buh an thar zah hnu a purun sen an chinchhunzawm theih nan kawng a dap pui dawn tur thu sawiin mithiamte rawn anih bakah purun sen chi tha an chin theih nan tan a lak dawn thu a sawi bawk. Zikhlum pawh vawikhata an thar chhuah huk chuan reilote ah a zo nghal duak thin a, supply a tam leh lutuk chuan a thartute pawhin an hlawk tur angin an hlawkpui thei thin lo ani tiin zikhlum pawh a tahtawla a chin hun ruahmana thar chhuah hun a rei zawk theih nan mithiamte a hmuna zirchiang tur leh kawng tha zawk dap pui tura koh chhuah a tum thu a sawi bawk.

Leilet neitute pawhin Pu Mathana chu Minister zinga an leilette a hmun ngeia tlawh sak hmasa ber tu anih thu sawiin lawmthu an lo hrilh a, an harsatna tawh hrang hrangte pawh a hnenah lo thlenin Minister chuan uluk takin a ngaihthlak sak a, Fur laia harsatna an tawh nasat ber pakhat Mat Lui "Kaipui" kai a tui lianin a tihbuai thin thu an sawi chu Minister chuan Lei dawh sak a tum thu a hrilh nghal a, hei bakah hian Leilet ram china inkalpawhna kawng te lutuk vanga harsatna an tawh pawh chu Minister chuan kawng laihzau sak nghal an nih tur thu hrilhin an thlai tharte lakkhawmna atana an mamawh tractor pawh theihtawp chhuah a ngaihtuah sak a tum thu a sawi bawk.

Zawlpui phai hi Serchhip atanga kilometer 7 vel a hla ah awmin Tlasik thlai ching thin chhungkua 150 vel an awm a, Zawlpui phai hi Zikhlum leh Antam chinna hmunpui niin kum kalta khan zikhlum Quintal 7000 vel lai an thar a, Antam pawh a tlangpuiin karkhatah Rs. 10000/- man vel an hawn thin thu leilet neitute hian an sawi a, an thlai thar te hi Aizawl atang te pawhin a hmunah an rawn lak sak thin thu an sawi. Zikhlum leh antam bakah hian Bean, Bawkbawn, Bawrhsaiabe, Tomato, Sweet Corn leh Purun Sen te an ching tel tlangpuia, purun sen hi nasa lehzuala hma lak thar tumin tunah hian chhungkaw 20 velin bul an tan mek a, Minister-in an hmalakna te tuipuia a hmun ngeia a rawn tlawh chu an lawmthu leh phurna nasa tak a pek thu purun sen chingtute pawhin an sawi a ni.

Zawlpui phaia leilet neitute chuan tlangram lo neih bansan leh ram tichereu lo zawnga eizawnna kawng an zawh thei chu an lawm tih sawiin mi hnuaia inhlawh ngaia an awmloh bakah an hlawkna tel atanga lirthei lei te, in tha tak tak sa te an awm tawh tih sawiin zikhlum atang ringawt pawh a kum khata Rs nuaih 10 chuang la lut an awm tawh thu an sawi a ni.

Minister hi Pu R.Zotawna, Director, Horticulture Department, Pu Andrew H Lalremruata, DIPRO, Serchhip, Pi Lucy Zaithangpuii, HDO, Serchhip ten an tawiawm a ni.

Source: DIPR, Serchhip