SOCIAL WELFARE MINISTER IN SERCHHIP KAWLRI-A EKLAVYA MODEL RESIDENTIAL SCHOOL SAK MEK TLAWH


Serchhip, 12th February 2014: Social Welfare Minister Pu P.C Lalthanliana chuan nimin tlai khan Serchhip Kawlri Tlanga Rs. Vaibelchhe 12 seng a Eklavya Model Residential School (EMRS) sak mek chu a tlawh a, hnathawh kal lai mek enfiahin hmachhawp la awm te pawh chipchiar takin a en a ni.

Minister chuan Eklavya Model Residential School sa tu Contractor te chu an hnathawh tawh chinah chuan sawiselna tur awm lova a hriat thu leh lungawithlak a tih thu hrilhin; a tawp thlenga inthlahdah lova thawk a, ram leh hnam tana ro tling tur thil a ni tih hre reng turin a chah a ni.

Hnathawktu Contractor te pawhin theihtawp chhuaha hunbi tiam chhung ngeia an hna thawk zo tura tan an lak thu an sawi a, Serchhip atanga Kawlri Tlang EMRS hmun hi 4.1 Kilometre lai anih bakah a kalpawhna kawng tha a awm loh avanga harsatna an tawh thu leh Tui lakna mumal a awmloh vanga harsatna an tawh thu an sawi chu ngaithla in Minister chuan he hna enkawltu PWD Project Division – III hnuaia Project Sub-Division (Serchhip) hotute hnenah a theih anga kawng zawnpui turin a ngen a, Electric Transformer bun fel a nih hnu a Electric Ban leh hrui te pawh thlun zawm vek a nih tawh hnu pawh a Electric Connection la awm lo chungchanga an harsatna pawh a rang lama tifel turin a hrilh nghal a, hnathawktute chu Phase –I hnuaia naupangte Sikul kal tir hman an nih ngei theih nan tan la nasa turin a hrilh bawk a ni.

Eklavya Model Residential School hi Scheduled Tribe naupang rethei leh chhumchhia ten a thlawna lehkha an zir theihna tur Sikul changtlung tak, Hostel awm nghal ni bawk tura ruahman niin, Sawrkar Laipui a Ministry of Tribal Affairs in India Danpui (Constitution) Article 275 (1) hnuaiah a sakna tur sum hi a pe chhuak a, tunah hian Phase-I atan Rs. Vaibelchhe 12 ruahman niin, Phase-I ah hian Administrative Building, School Building Block-I, Boys Hostel Block-I, Girls Hostel Block-I, thawktute chenna tur Type-I Quarters pakhat (4 units), Type-II Quarters pahnih (4 Units ve ve) leh Type-III Quarters (Principal chenna tur) pakhat sak mek a ni a , Internal Road leh Electricity pawh tel nghalin Internal link road hi laih zawh tawh a ni a, reiloteah Black Topping tur a ni. Electrict Transformer pawh bun fel tawh niin Electrict ban phun fel vek tawh a nih bakah Electric hrui nen thlun zawm vek a ni tawh a, sak zawh fel anih hnu ah Social Welfare department-in an enkawl thung ang. Phase-I ah hian zirlai naupang 100 (mipa 50, hmeichhia 50) awm theihna tura peih fel hman tum a ni a, nikum May thla vel atang khan Contractor 9 in hna an thawk a, hunbi tiam thla 18 chhunga zawh fel hman an inbeisei a ni.

EMRS, Serchhip hi zawh fel anih hnuah chuan Auditorium pakhat, Playground pahnih, Basketball Court pakhat, Girls Hostel Block hnih, Boys Hostel Block hnih, School Block hnih, thawktute chenna Quarters Type –I pahnih, Type-II Pasarih, Type-III pakhat, Computer Room etc., awm tura ruahman a ni.

Hostel hi Serchhip District chhunga naupang rethei leh chhumchhiate tana buatsaih niin an zirna atana senso zawng zawng bakah an mamawh dangte Sawrkarin a tum sak vek dawn a ni. Serchhip EMRS hmun hi 5572 Sq.m vela zau niin EMRS hi Lungleiah din a ni tawh a, Serchhip a mi hi Mizorama a pahnihna tur a ni a, hei bakah hian EMRS dang pathum sak leh tura ruahmanna kalpui mek a ni bawk.

Nimin tlaia Minister in EMRS sak mek a tlawhna ha hian Pu Vanlalnghaka Zote, Deputy Director, Social Welfare Department, Er. R. Zirsangliana, SDO PWD, Project Sub-Division, Serchhip, Pu Vanlalrova Ralte, BDO, Serchhip, Pi Lalhmangaihi, CDPO, Serchhip leh khawtlang hruaituten an tawiawm a ni.

Source: DIPR, Serchhip