SERCHHIPAH WORLD POPULATION DAY HMANG


Dated Serchhip, the 11th July, 2017: Vawiin chawhma dar 11 khan CMO Conference Hall Serchhipah World Population Day 2017 hman a ni a, Pu R. Kawlthuama, Vice President Sub Headquarters YMA Serchhip chu khuallian niin, World Population Day 2017 ah hian “Beiseina thar, Hmasawnna thar” “I chhungkaw hmasawnna chu i mawhphurhna pumhlum a ni” tih te chu thupui atan hman a ni.

He hun kaihruaitu Dr. Laldawngliana Sailo, CMO Serchhip chuan tun hma deuh khan population control hi kan ti nasa a, fa neih tlem kan inzirtir thin a, mahse Mizo te hi hnam tlemte kan nih avangin fa neih tlem aiin fa neih tam inzirtirna hi Kohhran leh khawtlangah chuan kan uar leh ta zawk a, Chutih rual chuan mipui pun chak em emna ram India-ah kan awm avangin sawrkar laipuiin hma lakna tura ruahmanna a siam chu kalpui a tul a ni a ti a. Population Day kan hmana kan ngaihtuahna luah thintu pawimawh tak chu Family Planning chungchang hi a ni a, chu chuan chhangkhat taka fa tlemte neih mai hi a kawk lova, chhungkaw din tura ruahmanna mumal tak nei turin min zirtir zawk a ni, a ti.

Sawrkar hian fa neih tlem ringawt hi min zirtir a tum a ni ber lova, Fa neih tlem ngawr ngawr aiin kan chhungkaw dinhmun ngaihtuah chunga khua leh tui tha tak ni thei tura kan enkawl theih tawk tur ka neih a tul ani a ti bawk.

Khuallian Pu R. Kawlthuama chuan damlo leh tanpui ngaite tanpui thintu kalkhawmte chu damlo te tana pan nuam leh biak nuam tak ni zel turin a ngen a. Sawrkar laipuiin Population control hi ngaipawimawh viau mahse Mizote tan erawh chuan chhungkaw hung tak nih hi kan la mamawh a, chutih rualin chhungkaw hung tak intodelh lo nih erawh thil tha lo tak a ni a, chhungkaw inrelbawlna tha erawh kan inzirtir uar zel a tul a ni a ti.

World Population Day 2017 hi thla khat chhung hman tur anih avangin hmun hniha then a ni a, June ni 27 – July ni 10 thleng khan Mobilisation Fortnight atana hman niin July ni 11 - July ni 24 thleng hian Population Stabilisation Fortnight atana hman a ni ang.

Vawiina he hun hmanna ah hian District chhung hmun hrang hranga thawktute an kal tha hle a ni.

Source: DIPR, Serchhip