SERCHHIP-AH SENSITIZATION WORKSHOP ON “NON-STRUCTURAL MITIGATION IN SCHOOLS UNDER NATIONAL SCHOOL SAFETY PROGRAMME” NEIH A NI.


Serchhip, 11th July, 2014: Vawiin chawhma dar 11:00 khan Serchhip DC Conference Hall-ah “Sensitization Workshop on Non-Structural Mitigation in Schools under National School Safety Programme (NSSP)” neih a ni a, Serchhip District chhunga NSSP hnuaia School thlanchhuah School 150 atangin zirtirtu engmawzat an tel a ni.

Non-Structural Mitigation hi School-ah naupangte him taka an awm theihna tura hmalakna a ni a, School building leh bungrua chi hrang hrangte chu naupangte sahimna atana hlauhawma a awm leh awmloh enfiah a; a him zawk leh tha zawk a ruahmanna siam a pawimawh zia te inzirtir a ni a; blackboard/greenboard tar dan ah te, laboratory bungrua dah dan te, electric wiring ah te, pangpar khawina pot dah dan te thlengin fimkhur a tul thu leh Mizorama kan school building tam tak te hi hlui tak tak te an nih tawh avanga fimkhur tak leh uluk lehzuala enkawl a ngaih thu te inzirtir a ni a, School aiawha workshop-a tel zawng zawngte chu an School-a bungrua leh hmanraw chi hrang hrang naupang sahimna ti derthawng thei dinhmun a ding zawng zawng chhinchhiah tura tih an ni a, a rang thei ang bera a list kimchang thehlut tura hrilh an ni bawk.

Vawiin Workshop neihna a thusawitu Pi B.Malsawmtluangi, MCS, Nodal Officer, DM&R, Serchhip District chuan Serchhip District chhunga NSSP kalpui anih dan a sawifiah a, NSSP hi kum 2012 atanga kalpui tan niin Misoramah chuan Serchhip District leh Aizawl District hi pilot project atan bul tan nan hman ani rih a, Serchhip District ah hian NSSP hnuaiah School 150 thlanchhuah tawh niin zirtirtu 350 hnenah training mumal taka pek an ni tawh a, School thlanchhuah zawng zawng ten Disaster Management Plan an siam vek tawh a, an zinga School 95 te chuan Mock-Drill an nei tawh bawk a ni. NSSP School zawng zawngah hian kangmei thelhna hmanrua Fire Extinguisher pek vek an ni tawh bawk.

Vawiin Workshop ah hian NSSP School te hnenah hian Non-Structural mitigation to schools fund first installment Rs. 5000/- theuh Pu V.L.Remliana, MCS, Addl DC chuan a sem a, hemi hmang hian an school a naupangte tana himlo bungrua senghawi/siamthat ngai te an siamtha ang a; an siamthat hman leh siamthat hnu thlalak nen report an thehluh hnu ah second installment Rs. 4000/- pek an nih leh dawn tih Pi Zotinkimi, District Project Coordinator, NSSP chuan a sawi a, School thenkhat Mock-Drill report la thehlut lo te chu Mock-Drill Report an thehluh hma chuan second installment hi pek an nih dawn loh thu a sawi bawk.

Vawiin Workshop hi Pi Chuaupari, District Organizer, DM&R Serchhip District chuan a kaihruai a, Aizawl atangin Pi Laldingliani, Accounts Officer, National School Safety Programme, Mizoram in he hun hi a hmanpui bawk a ni.

Source: DIPR, Serchhip