ASHOK CHAKRA LAWMMAN DAWNG TUR RAWT THEIH


Dated Serchhip, the 11th April, 2017: Sawrkar laipui chuan India mi, mi huaisen leh chawimawi tlak te a chawimawi thin a. Chung chawimawina a hlan thin zinga langsar ber leh sang ber chu Ashok Chakra Award hrang hrang (Ashok Chakra Series), ram leh hnam chhantu mihuaisen te hnena a hlan thin chu a ni.

Ashoka Chakra hi mite hriat hlawh hat khawpa mi huaisen, mahni nunna thapa hlauhawm laka ram veng himtute (most conspicuous bravery) hnenah pek theih a ni a, Kirti Chakra chu langsar thama pasaltha, ram leh khawtlang venhimna lama thil tite (conspicuous gallantry) hnenah hlan niin Shaurya Chakra chu pasaltha huaisen (gallantry) te hnenah pek theih a ni. Heng lawmman dawng tura thlante chu Independence Day ah emaw Republic Day ah ropui taka hlan thin an ni. Defence (sipai) lama thawkte chauh nilovin India khua leh tui (civil) mite, Police Forces mite, Central Armed Police mite leh Railway Protection Forces mite pawhin an heng lawmman te hi an dawng thei vek a ni.

Sawrkar laipui chuan ram chhungah mi huaisen chhuanawm tak leh chawimawi tlaka hnathawk engemawzat an awm thin tih a hria a, chung mite chu chawimawina zahawm leh hlu tak pek an nih theih nan rawtna (recommendation) a tam thei ang ber lut se a duh a. He Ashok Chakra Series Award dawng tlak nia hriatte hming thehluh theih hun tunah hian a hawng mek a ni.

Serchhip District chhunga hming thehlut duh tan dilna Form siam sa, SDO Sadaar Office ah leh DIPRO Office ah lam theihin a awm a, District danga mite tan pawh an District Bawrhsap pisaah leh DIPRO Office ah te ngaihven theih a ni ang.

Dilna hian 15 April, 2017 hmain Mizoram sawrkar Home Department a thleng hman tur a ni a, an nin sawrkar laipui lamah lehkhate chu an thawn thla ve leh dawn a ni.

Source: DIPR, Serchhip