SERCHHIP DISTRICT-AH SOIL & WATER CONSERVATION DEPARTMENT TEN NLUP TANPUINA AN SEM


Serchhip, 10th July, 2015: Vawiin chawhma dar 11 khan Serchhip Hmar Veng YMA Hall-ah Soil & Water Conservation Department, Serchhip District chuan an hnuaia NLUP Third leh Fourth Phase tanpuina dawngtute hnenah tanpuina sum an dawn thawh hnihna an sem a, Pu George Lalromawia, Director, Soil & Water Conservation Department chuan khuallian niin he hun hi a hmanpui a, Pu Vanlawma DSCO Hnathial chu khualzahawm a ni.

Khuallian Pu George Lalromawia chuan tunlaiin India ramin sum dinhmunah harsatna a tawk mek a, chu chuan Mizoram pawh min nghawng tel a,chutih laia NLUP tanpuina sum sem theiha a awm hi a buaipuitu kan hotute an fakawm hle a ni a ti a. Serchhip District chu ram laili awm kan ni a, chuvangin midangte entawn tlaka heng tanpuina sum kan dawnte hi a hmanna tur dik taka hmang a, NLUP hlawhtlina atana MIzoram puma sul sutu ni tura tan la turin kalkhawmte a chah a ni.

Khualzahawm Pu Vanlawma pawhin thusawiin NLUP hi sem leh dawn ringawt a ni lova, sawrkarin a tum ber chu eizawnna nghet kan neih theihna tur kan dinhmun chawikan a ni a, harsa tak chunga, a pung awm miah lova sawrkarin cheng nuai khat min pe hi kan vannei hle a ni a ti. Kan pawisa dawnte a hmanna tur dik taka renchem taka hmanga, hlawhtlinpui ngei turin tanpuina dawngtute a chah a ni.

Soil & Water Conservation Department hnuaiah hian NLUP Trade pathum - Hmunphiah, Coffee leh Rubber awmin 3rd Phase-ah beneficiary 89 (Hmunphiah - 50, Coffee - 21, Rubber - 18) an awm a, 4th Phase-ah beneficiary 40 (Hmunphiah - 20, Coffee - 15, Rubber - 5) an awm a ni.

2nd Installment-ah hian Hmunphiah thlangtuten Rs. 226600/- theuh dawnginTerrace siamna, Terrace inkar changkham atan leh thlam sakna atana hman tur a ni.

Coffee thlangtute hian Rs. 64400/- theuh dawngin an hnenah hian Coffee tiak sem ani tawh a, tanpuina sum an dawn hi tuikhuah siam nan te, coffee phunna tur hmunhma buatsaih nan te, coffee puitlin hma a chhawmdawlna atan te, lei tha pek na atan te leh tul hrang hrang hmanna tur Department-in ruahmanna an siam sak a ni.

Rubber thlangtute hian Rs. 45000/- theuh an dawnga, an sum dawn hi Rubber phunna tur terrace siam nan te, khur laihnan te, a hmunhma enkawl faina te, lei tha man atan te, rannung thahna hlo man tur te leh tul dang atana hman tur a ni.

Tanpuina sum hi Khuallian Pu George Lalromawia'n mi panga hnenah sum faiin a sem a, midang zawng chu an bank account-ah dah luh sak vek niin APR-ah beneficiary te hian an hming an ziah hnan a, vawiin NLUP tanpuina dawngtute hian vaiin mi 129 ani.

Vawiina NLUP sem inkhawm hi Pi Rosy Lalmuansangi Hmar, DSCO, Serchhip in kaihruaiin report a pe a, Pu JH Laldingliana, RO Serchhip Range in lawmthu sawinain hnu a khar a ni.

Source: DIPR, Serchhip