MIZO THALAI INFIAMMITE HMASAWNNA AH SPORTS MINISTER LAWM

“ZONET, LPS, DDK LEH PRINT MEDIA TE CHUNGAH LAWMTHU KA SAWI” - ZODINTLUANGA


Serchhip, 10th February, 2015: Vawiin chhun dar 11:30 khan Serchhip District Tuikum Biala Hmuntha khuaah Sports Minister Pu Zodintluanga’n ni 9 chhung awh tur 2nd Hualliana Memorial Football Tournament a hawng a, hawnna ah hian thusawiin Pu Zodintluanga chuan ZONET, LPS, DDK leh Print Media ten Sawrkarin infiammite hmasawnna tura hma a lakna a an thlawp that avang leh anmahni ngei pawhin Mizo thalaite talent haichhuak leh phochhuak tura ruahmanna chi hrang hrang an siam thin avangin Sports lamah pawh a taka hmuh theihin Mizoramin hma a sawn a ni a ti a, Media te hnenah lawmthu a sawi a ni.

Sports Minister chuan National Games neih meka Mizoramin Football Champion nihna a chang chu ropui a tih thu legh MFA leh inkhel mite thawhrimna rah a ni a ti a, infiamna lama hmasawnna nasa taka kan neihchhan hi ZONET, LPS, DDK leh Print Media ten thahnemngai taka mipui zirtir chung leh tualchhunga infiamna an chawilar rah a ni a, an chungah lawmthu ka sawi takmeuh a ni a ti bawk. Thalai infiam mite pawh fuihin Minister chuan National Games Football Champion Team a tel zinga a chanve aia tam hi thingtlang tlangvalte an ni a, chutiang bawkin nikuma Santosh Trophy Champion Team a a tam zawk pawh thingtlang lam mi an ni a, Mizoram tana medal hawn tawh zawng zawng zinga 80% chu thingtlang lam mi an ni bawk a, hei hian thingtlang lamah talent a awmtha tawka ni tih a tilang chiangin, insumtheihna leh taimakna nen a tan an lak phawt chuan Mizoram mai bakah India ram tihmingthatu an la ni thei tih hria a mahni inrintawkna nei turin a fuih a ni.

Pu Zodintluanga chuan infiamna ruhrel (infrastructure) siam kawngah Sawrkarin nasa taka hma a lak thu leh theihtawp chhuaha thalaite hmakhua ngaia hma a lak chhunzawm zel dawn thu a sawi a, khawpui leh District Headquarters ah te nasa taka hma lak niin Aizawl, Lunglei, Champhai, Serchhip leh Kolasib ah te stadium puitling sak mek anih thu te, thingtlang lam hawia hma lak tan anih thu leh tun sawrkar kum kal mekah pawh thingtlang khaw hrang hrang 20 tuam hman anih thu te, thingtlang kilkhawr lehzual lamah pawh hmalak chhoh mek anih thu a sawi a, Sports Discipline hrang hrang tan infrastructure tha leh rintlak siam mek zel anih thu leh thalai ten an hman tangkai ngei a beisei tlat thu sawiin Hmuntha a a pa hriatrengna Football Tournament buatsaihtu Er. K. Lalsawmvela chungah lawmthu a sawi bawk a ni.

2nd Hualliana Memorial Football Tournament hi vawiin February ni 10, 2015 hian khelh tan niin February ni 18, 2015 ah Final khelh a ni ang a, tun tumah hian Team 14 telin an zinga Team 2 hi Aizawl atanga tel an ni a, Hmuntha khua atangin Team 3 telin a dang zawng hi Hmuntha khaw chhehvel atanga tel an ni. Team 14 te hi Group 4 ah then hran niin Group tina Team te an inkhelh kual vek hnu ah a sang pahnih theuhin Quarter Finals an khel ang. Tournament Champion hian tangka fai Rs. 12,500/ + Trophy + Winners’ Medal an dawng ang a, Pahnihna in Rs. 7,000/- + Trophy + Medal an dawng ang.

Source: DIPR, Serchhip