SERCHHIP AH REPUBLIC DAY HMAN DAN TUR REL


Dated Serchhip, the 10th January, 2017: Vawiin hian Serchhip DC Committee Room ah kan hma lawka India Republic Day lo thleng tur lawm dan tur relin Bawrhsap Dr. Lalrozama, IAS kaihhruaina hnuaiah Department hrang hrang aiawh leh tlawmngaipawlte, khawtlang hruaitu leh chanchinbumite an thukhawm.

Vawiina Meeting hian Republic Day hi Khawtetlanga DC Playground ah zing dar 11:00 a.m ah hman nise an ti a, khuallian atan Bawrhsap Dr Lalrozama,IAS chu ruat a ni. He hunah hian kum danga tih thin anga Parade Contingent ten hnam puanzar chibai an buk bakah Assam Rifles ten Arm Display nei tura ruahmanna siam a ni, mipuite mit titlai tur show dang pawh buatsaih tum a ni. Tin, he ni denchhen hian Serchhip a Home hrang hrang leh Hospital-ah te thilpek hlan a ni ang. At Home Tea Party pawh chhun dar 12:00 ah DC Bangla tualah neih nghal tura ruahmanna siam a ni bawk a. At Home Tea Party ah hian kum kal ta chhunga Serchhip ti hmingthatu kawng hrang hranga mi bikte sawm tel an ni ang.

Republic Day 2017 hlawhtling taka hman a nih theih nana inbuatsaihna lam chi kawng hrang hrangte rel nghal a ni a, mawhphurhna hrang hrangte pawh a changtute ruatin inbuatsaihna hi kalpui tan nghal tur a ni.

He Meeting ah hian Serchhip SP Pu Lalringdika leh District Officers te an tela, VC te, tlawmngaipawl leh chanchinbumi thahnem tak an tel bawk a ni.

Source: DIPR, Serchhip