SAGY VILLAGE TE TAN GIC (Re) CSR 2016-17 FIRST INSTALMENT SEM


Dated Serchhip, the 9th September, 2016: Vawiin hian DC Conference Hall ah Bawrhsap Dr. Lalrozama, IAS chuan Mizoram a Sansaad Adarsh Gram Yojana khaw pahnih Chhiahtlang leh Khawlailung khuate tana General Insurance Corporation of India - Reinsured (GIC-Re), Mumbai in an Corporate Social Responsibility Fund 2016-17 an ruahman sak First Instalment chu a dawngtu tura thlan te hnenah a hlan.

Dr. Lalrozama chuan, Mizoram sawrkar in SAGY khaw pahnihte hnena GIC (Re) CSR hman a rem tih sak angin nikum lam atangin hma lak tan a ni a, he tanpuina dawngtu leh hmangtuten an thawh that avang leh a enkawltu DRDA Serchhip ten an vil that em avangin a petute mit a tlung hle a ni, a ti a. Kumin Project a tanpuina dawngtute pawhin tha taka kan kalpui leh theuh ka beisei a, hlawhtling ngei turin mahni zawn theuh ah theih tawp kan chhuah leh dawn a ni, a ti.

Kumin 2016-17 atan hian GIC (Re) CSR atangin Khawlailung ah mi harsa zawk chhungkaw 35 te hnenah trade hrang hranga eizawnna bul tanna tur (Sustainable Livelihood Assistance) Rs 60,000 aia tam lo theuh pek an ni a. School pathum, Government Middle School-I, Government Middle School - II leh Mt. Carmel Government Aided School hnenah Smart Classroom Project atan Laptop, LCD, Projector, Screen, Speaker leh adangte pek an ni. Chhiahtlang khaw hnenah thung chuan mi harsa zual chhungkaw 30 hnenah trade hrang hrang a mi tur Livelihood Assistance hi Rs 60000 aia tam lo theuh pek an ni a, Smart Class Room Project atangin Government Middle School leh Government National Middle School hnenah Laptop, LCD, Projector, Screen, Speaker leh a dangte pek an ni bawk. Tin, Dumping Ground an lo siam tawh sa panna leh a hungna tur atan Rs 1.65 Lakh leh Health Sub-Centre panna kawng siamna tur pek an ni bawk. Hei bakah hian vawiina la pek chhuah hman tak loh Handloom Development Project atangin Buan Banna Khawl pek an ni bawk ang.

First Instalment ah hian tanpuina an dawn tur hmun thuma thena hmun khat theuh pek an ni a, a dawngtuten an hman dan a zirin second instalment pawh reilotea pek chhuah leh thuai beisei a ni.

Nikum lamah khan khaw pahnihte hian Livelihood ah chhungkaw sawm ve ve hnenah te, Smart Classroom atan School thlan bikah te leh Clean & Green Project atangin Sanitary Truck te he CSR hnuai atang hian an lo dawng tawh a ni.

GIC CSR hi tha taka hman a nih avangin a petu Corporation te an lawm hle a, chuvang chuan Dr. Lalrozama, Serchhip Bawrhsap ngenna angin GIC hian Serchhip khaw chhung tan an CSR hi engemawzat an pe ve dawn a, Livelihood Project atangin chhungkaw 20 te hnenah Rs 60000 aia tam lo theuh, Serchhip khawchhung kawngpui kama dah tur Solar Street Light 95 leh Puan tahtute in hman tawm tur Puan Banna Khawl pathum leh a enkawl zuitu tur mi pathum trainingna te a pe dawn a, buaipui nghal mek a ni.

Vawiin a CSR tanpuina sem inkhawm hi Pi Esther Lalhlimpuii, APO (M) DRDA Serchhip in a kaihruai a, Pu P. Thangsuanlau, PMRDF, DRDA Serchhip chuan CSR Project an kalpui dan tlangpui report a pe thung. Chhiahtlang khaw VCP Pu R. Dothanga leh Khawlailung VCP Pu Thangbawiha te pawhin thusawina hun an hmang bawk.

Source: DIPR, Serchhip