SERCHHIP DISTRICT-AH MLPC ACT 2014 KHAUH TAK A KENKAWH A NI

“MLPC ACT hnuaia mi panga hrem mek”


Serchhip, 9th September, 2015 : Mizoram Sawrkar thuchhuaka January ni 15, 2015 a MLPC Act 2014 hman a nih atang khan Serchhip District chhungah khauh taka kenkawh a ni a, Dan bawhchhia mi engemawzat he Dan hmang hian hrem ni tawhin tunah hian mi panga hrem mek an ni.

Section 43 (a) of MLPC Act, 2014 tlawhchhanin Pu Lalngaihmawia Zote, CJM chuan nimin khan MLPC Act bawhchhia mi panga hremna order a tichhuak leh a, heng hremna tawk te hian zu in phalna “liquor card” nei lova zu an in avang leh khawlaia zu an ruih tel bawk avangin man an ni a, Excise & Narcotics Department a thawk ten “breath analyser” hmangin an test vek bawk a ni tih Pu Rongura, Superintendent, Excise & Narcotics, Serchhip District in a sawi a, a hnuaia mite hi tuna hremna tawk mek te chu an ni :

1) Lalhruaitluanga s/o Ramzauva, East Lungdar
2) C.Lalrinsiama s/o C.Zonunsanga (L), Tlungvel
3) Lalrinnunga s/o Darthankima, Bungkawn Nursery Veng, Aizawl
4) Lalhunkima s/o Lalnghakmawia, Chhiahtlang, Serchhip
5) Lalrinpuia s/o Biakkima, Bethlehem Vengthlang, Aizawl

An vai hian section 42(2) of MLPC Act, 2014 an bawhchhiat vanga hrem an ni a, ni li chhung Social Work ti tura hrem an nih angin Serchhip Bazar leh a chheh vel vawiin atanga ni li chhung an tih fai dawn bakah Rs. 500/- theuh chawi tir an ni a, Lalrinpuia s/o Biakkima, Bethlehem Vengthlang, Aizawl erawh hi chuan Social Work hi a tih ve duh loh avangin Pu Lalngaihmawia Zote, CJM chuan thla 6 chhung Jail tang turin a hrem thung a ni.

MLPC Act, 2014 hman anih hnu hian Serchhip District ah dan lova zu zuar/siam mi 79 leh zu rui mi 39, an vaiin mi 118 man an ni tawh a, hremna pawh pek vek an ni.

Source: DIPR, Serchhip