SERCHHIP AH GREEN MIZORAM DAY HMANG


Dated Serchhip, the 9th June, 2017: Vawiin hian Serchhip District Green Mizoram Committee ruahmanna in Green Mizoram Day, 2017 hman a ni a. Kum 2015 Green Mizoram Day a Department leh tlawmngaipawl hrang hrangten thing an lo phun tawh- Zawlpui kawnga mi chu an samfaiin a tul angin an phun belh.

Thingphun hawnna inkhawm tawite, Zawlpui pengthuama neihah Bawrhsap Pi Sangchhin Chinzah chuan, he ram hmalam hun hi vawiina mite kutah a innghata, kan tu leh fate tana chen zui zelna tlak, chhuan tam tak lo la awm zel turte ngaihtuah chunga kan enkawl a tul a ni, a ti. Bawrhsap hian he pengthuamah hian Day hawnnan thing a phun nghal a, chumi zawhah kumina District chhunga kangmei venna kawnga thawktha khuate hnenah lawmman a hlan nghal bawk. Lawmman dawngtute chu pakhatna; Bungtlang, pahnihna Sialhau leh pathumna Thenzawl East village Council te an ni.

A hawnna hun tawi neih zawh hian Department hrang hrangte chuan an chanpual theuhva kum hmasa lama an lo phun tawh hote an sam fai a, hung la ngaite hungin, phun belh ngaite an phun belh bawk. Hemi atana hmanraw mamawh zawng zawngte hi Nodal Deparment, Environment, Forest & Climate Change Department ten an ngaihtuah sak vek a ni.

Hetianga Department hrang hrangten thingphunna lama hun an hman lai hian Office zawng zawngte chu a tul anga mipui tana dawr theihin an inhawng vek tho a ni.

Source: DIPR, Serchhip