A.H VETY DEPARTMENT SERCHHIP-IN AR VULH THLANGTUTE HNENAH NLUP 3RD & 4TH PHASE TANPUINA A SEM


Dated Serchhip, the 8th November, 2016: Vawiin chawhma dar 11:00 khan New Serchhip YMA Hall-ah AH & Vety Department Serchhip chuan an Department hnuaia Ar vulh thlangtute hnenah NLUP 3rd & 4th Phase-a tum khatna atan tanpuina sum an sem.

He hun hi Dr. R. Lalmakthanga, Fodder Development Officer, Serchhip in a kaihhruaia, NLUP kalpui mekah tanpuina dawng hmasatute zingah theihtawp chhuaha hma la an awm laiin, thenkhat hma la tha duh lo ten NLUP hmel an ti mawi lo a, a pawi hle a ni a ti a. Vawiin tanpuina sum an hlan turte hi NLUP hmalakna hnuhnung lam anih tawh dawn vangin an pawimawh takzet ani a ti a, theihtawp chhuaha, NLUP hmanga hlawhtlinna changtu ni thei theuh turin a chah a ni.

Vawiina tanpuina sum an sem hi Ar in sakna tur a ni dawn a, Ar in an sak dawnin midang tana rimchhia leh hnawksak a ni thei em tihte ngaihtuah chunga, thenawmte leh vantlang tana hnawksaklo thei ang bera sa turin leh mithiamten sak dan tur an sawi ang taka sa ngei turin a chah bawk.

Dr. H. Vanlalrawna, Veterinary Officer, Serchhip chuan Ar in sak dan tur leh Ar enkawl dan tur zirtirna a pe a. He hunah hian Village Level Monitoring Commiitte memberte thahnem tak an tel bawk a ni.

AH &Vety Department Serchhip hnuaiah Ar vulh thlangtu hi NLUP 3rd phase-ah hian mi 151 awmin, 4th Phase-ah mi 131, an vaiin mi 282 an awm a. Vawiinah hian District chhunga khaw hrang hrang 9- New Serchhip, Chhiahtlang, Ngentiang, Rullam, Sialhau, Lungpho, Bungtlang, Keitum leh Hriangtlang atangin mi 106 hnenah tanpuina sum Rs. 22,40,000/- sem chhuah a ni a, tanpuina sum te hi Bank Account kaltlanga pek an ni.

Source: DIPR, Serchhip