SERCHHIP-AH “DISASTER RISK REDUCTION DAY” HMANG


Serchhip, 8th October, 2014: Vawiin chawhma dar 11:00 kha Serchhip District Disaster Management Authority (SDDMA) buatsaihin Serchhip DC Conference Hall-ah Disaster Risk Reduction Day hman a ni a, Serchhip khawpui huam chhunga MHIP leh YMA Branch hrang hrang aiawhte, Suh Headquarters YMA, Serchhip bakah Sub-Headquarters MHIP, Serchhip aiawhte, Serchhip khawpui huamchhunga Village Council hrang hrang aiawhte, Sawrkar hnathawk te an tel tha hle a ni.

Serchhip District Bawrhsap Pi Juhi Mukherjee, IAS chuan Chhiatrupna lo thlen hun tur leh lo thlenna hmun tur tumahin kan hrelawk thei lova, amaherawhchu chhiatrupna in harsatna min siam sak thin te tinep tur hian kan inpuahchah ve thei a ni a ti a, Serchhip District chhungah chhiatrupna laka inven dan leh hmachhawn tura inpuahchah dan tur inzirtirna abik takin zirlaite zingah uar taka kalpui mek a ni a, hetih rual hian tlawmngai pawl leh khawtlang hruaitute pawh hetiang atana inbuatsaihna tha an neih theih nan nasa lehzuala zirtirna kalpui tum a nih avanga “Disaster Risk Reduction Day” hmanpui tura sawm an nih thu a sawi a ni.

Vawiin Disaster Risk Reduction Day hmanna ah hian zirtirna pe turin mithiam bik te sawm an ni a; Pi Teresy Vanlalhruaii, MCS, Project Director, DRDA, Serchhip chuan “Inchhung khura chhiatna thleng thei chi hrang hrang hmachhawn tura hmeichhiate mawhphurhna” tih thupuia hmangin zirtirna a pe a, Pi B. Malsawmtluangi, MCS, SDC hnen atangin “Chhiatrupna hmachhawn tura Khawtlang leh Chhungkaw tinte inpuahchah dan tur” tih thupuia hmangin zirtirna ngaihthlak a nih bakah, Fire & Emergency Services Department ten Chhiatrupna lo thlen huna chhanchhuah hna thawh dan tur te, chet lak dawna tih tur leh tih loh tur chi hrang hrangte chetzia a lantirin zirtirna an pe bawk a ni.

Vawiin inkhawm hi Pu Lawmkima, MCS, SDO(Sadar) in a kaihruai a, Tlawmngai Pawl hrang hrang leh Joint VC aiawhten thusawina hun an hmang bawk a, Pu lalnunfela Chawngthu, MCS, SDC in lawmthu sawiin hun a khar a ni.

Serchhip rual hian North Vanlaiphaiah leh Thenzawlah bialtu SDO(C) ve ve kaihhruaina in Disaster Risk Reduction Day hi hman ani bawk a ni.

Source: DIPR, Serchhip