SERCHHIP AH LEGAL AWARENESS CAMPAIGN NEI


Dated Serchhip, the 8th September, 2016: Vawiin chawhma dar 11:00 hian Serchhip District Court Conference Hall ah Serchhip District Legal Services Authority huaihawtin Police, Excise & Narcotics leh Sub-Hqtr. YMA Serchhip ten Legal Awareness Campaign an hmang.

He campaign hawngtu Pu Lalringdika, Superintendent of Police, Serchhip chuan sawrkar, YMA, Police leh Excise te thawh hona Ruihhlo Do beihpui kan thlak mek atana min puitu tur campaign buatsaih a ni chu lawmawm a tih thu a sawi a. India khua leh tui kan nih chuan kan phak tawkah dan kan hriat ve hi a tula, dan hriat loh hi chhuanlam tling a ni lo a ni, a ti. Mizote kan vanneihna chu sawrkar leh tlawmngai pawlten thawh hona tha tak kan nei hi a ni a, khawvel hmun danga mite neih loh kan nei hi a vanneih thlaka, thawh hona tha lehzual nena hma lak zel theih ka beisei a ni, a ti bawk.

Tlawmngai pawlte leh sawrkar miten theihtawp chhuahin dan bawhchhiate man chhuakin turin tha kan thawh thin a, dan leh hrai kan hriat loh avanga kan hnathawh sate engmah lova chhuak ta a awm fo hi a pawi a, chutiang harsatna sutkian nan chuan dan kan hriat hi thil tul hmasa a ni, mawlmang taka che mai lovin dan hnuaiah zel thil ti ila, a hlawk em em dawn a ni, tih thu a sawi bawk.

He hunah hian Pu MS Dawngkima, Addl. SP, Serchhip chuan ND & PS Act chungchang kalkhawmte a zirtir a. Pu H. Rongura, Superintendent of Excise pawhin MLPC Act chungchang zirtirna a pe bawk.

Pu Lalngaihmawia Zote, Secretary, District Legal Services Authority leh Chief Judicial Magistrate ni bawk chuan he hun hi a kaihruai a, Legal Awareness an buatsaih tawh chinah chuan he hun hi a pawimawh berte zing a mi a nih thu leh kalkhawm ten hlawk taka an hman a duhsak thu a sawi.

He Campaign ah hian Police Department-a thawktute, Excise Department-a thawktute leh Sub-Hqtrs. YMA aiawhte an kal tha hle a ni.

Source: DIPR, Serchhip