NAUPANG HUAISEN LAWMMAN 2016 DILNA HUN HAWN MEK A NI


Dated Serchhip, the 8th July, 2016: Kum 1957 atanga India sawrkar laipuiin Indian Council for Child Welfare (ICCW) kal tlanga a lo tih tawh thin angin kuminah pawh Naupang kum 6 leh kum 18 inkar, naupang dangte entawn tlaka mahni nunna emaw hliam tawrh emaw pawh hnial lova misual leh vantlang tana hnawksak (social evil/crime) beitute hnenah National Award a sem leh dawn a. A dilna/dawng thei tur rawtna hun September ni 30, 2016 thleng hawn mek a ni.

He lawmman diltute thil tih chu July ni 1, 2015 leh June ni 30, 2016 inkara thil thleng a ni tur a ni a, dilnaah thil thlen dan tlangpui, thumal 250 vela ziakte, pian ni, thla leh kum finfiahna lehkhate, Newspaper/Magazine a thil thlen dan report copy te, FIR emaw Police Diary copy te thiltel tur a ni. Tin, a thiltihte chu a dik ngei a ni tih hriatpuina heng a hnuaia thuneitute zinga atanga pahnih talin an ziah sak bawk tur a ni.

1. Naupang in school a kalna Principal/Headmaster emaw an khawtlang hruaitute (VC)
2. State Council for Child Welfare President emaw General Secretary.
3. Deputy Commissioner emaw a tlukpui sawrkara hotu.
4. SP emaw SP chin chunglam Police Officer te.

He lawmman hi Medal, Certificate leh Pawisa fai tea pek a ni thin a, ram pum huap tlawmgaipawl liante hnen atangin duhsakna thilpek an dawng thin bawk. Tin, a dawngtu chu School a kal chhung zawng zirna man tanpuina pek a ni a, Professional Course zir chhunzawmte hnenah ICCW Scholarship Scheme pek thin a ni bawk.

Serchhip District chhunga cheng, he lawmman dil duh emaw, dawng tlak nia hriat rawt duhte emaw chuan District SDO Sadaar hnenah emaw District Information and Public Relations Office ah emaw dilna Form ngaihven leh zawhchian theih a ni a, District danga mite chuan an awmna District thuneitute hnenah emaw State Council for Child Welfare hnenah te dilna form ngaihven theih a ni ang.

Source: DIPR, Serchhip