DBTL VANGA HARSATNA CHUNGCHANG SERCHHIP BAWRHSAP PISA AH SAWIHO A NI


Serchhip, 8th June, 2015 : Vawiin khan Serchhip DC office chamber-ah Direct Benefit Transfer of LPG (DBTL) Scheme chungchang ngaihtuaha thutkhawm a ni a, hetah hian District Bawrhsap Pi Juhi Mukherjee, IAS hovin Consumer Union hotute, Bank aiawh leh LPG Distributor ten tunlai a Gas cylinder la te Bank Account a Subsidy a luh loh chungchang an sawiho a ni.

Bawrhsapin vawiin thutkhawm hi kaihruaiin DBTL Scheme avanga Serchhip District in harsatna an tawh dan leh mipui lam atanga zawhna awm te Pu Rosangmawia DCSO-in a tarlang a, hemi hnuah hian zau taka sawihona hun hman a ni a; DBTL hnuaia Gas la te zinga mi thahnem tak chuan an Bank Account a Subsidy a luh loh avangin an buai hle thu sawichhuah niin hemi chungchangah hian Bank lam hotute chuan mi thenkhat Bank Account chu hun rei tak an khawih chet loh avangin a thi thin niin an sawi a, chuvang chuan Gas Subsidy pawh hi an account chuan a dawng theilo ni a an rin thu an sawi. Bank account reng reng thla ruk chhung vel transaction vawi khatmah tih anih loh chuan a thi thin a, hemi tinung leh tur chuan transaction hi an tih ngei ngei a ngaih thu an sawi bawk. Consumer Union lam pawhin mipui te harsatna hrang hrang te tarlangin, Gas ngaihtha taka lo la ve an Bank account a pawisa a luh loh avanga mangang taka awm mek tam tak awm chu tha an tih loh thu sawiin an harsatna te chu tang tlanga chinfel pui a that thu an sawi bawk a ni.

Kalkhawm te thutlukna angin Serchhip District Consumer Association te chuan thuchhuah siam nghalin Gas consumer Bank Account a Subsidy lut lo zawng zawng te chuan a rang lamin anmahni account neihna Bank ah Passbook nen kalin an account an tinung vek tur a ni a, account tinung tur hian pawisa tlem azawnga an account a an dahluh emaw an lakchhuah emaw a ngai thung dawn a, Bank account an tihnun zawhah Gas Distributor te hnenah kalin an in report leh ang a, Gas Distributor te chuan chinfel sak an lo tum dawn a ni.

Source: DIPR, Serchhip