SHALOM SPECIAL SCHOOL, SERCHHIP HNENAH TANPUINA CHI HRANG HRANG HLAN A NI


Serchhip: 8th June, 2012: Pu Lal Thanzara, Parliamentary Secretary, ALIMCO, New Delhi leh 14 Assam Rifles, Serchhip ten a Shalom Special School, New Serchhip a rualbanlo te hman tur thawmhnaw leh hmanraw chi hrang hrang an pek chu vawiin chhun khan Colonel Ratnakar Trivedi, 14 Assam Rifles Commandant, he Special School Principal ni bawk chuan a dawng tur a thlanchhuahte hnenah a hlan.

Vawiin a tanpuina semchhuah te hi Pu Lal Thanzara, Parliamentary Secretary-in a pek School Uniform chi kim (kawr, kekawr, mawza leh pheikhawk) an zavaia daih tur leh Managing Board member ho hak tur T-Shirt pakhat theuh bakah ALIMCO, New Delhi ten an pek Wheel Chair – 4, Armpit Crutch – 5, Blind Stick – 2 te, 14 Assam Rifles ten an pek tangka fai Rs. 2000, USHA puanthui khawl pakhat, Blanket leh eitur chi hrang hrang te a ni.

Thilpek hlan tu 14 Assam Rifles Commandant Colonel Ratnakar Trivedi chuan Shalom Special School chu thinlung taka a hmangaih thu sawiin mamawh an neih apiang a hnena thlen thin tur leh a theih ang ang a a puih zel dawn thu a hrilh a, hei bakah hian July thla remchang hmasa berah rualbanlo te chu Hmuifang Tourist Resort a picnic pui a tum thu leh School tanpuina atan a thian tha te hnenah donation a khawnsak dawn thu a sawi bawk.

Shalom Special School hi mithahnemngaite hmalakna a bul tan ni in kum 2005 khan hetih laia bialtu MLA, tuna Chief Minister ni ta Pu Lal Thanhawla’n a hawng a, hun rei tak building tha an neih loh hnu ah 14 Assam Rifles ten tuna school building luah lai hi an sak that sak a, June ni 18, 2011 khan Assam Rifles DIG in a hawng a ni, School choka tur pawh tha takin 14 AR te hian an sak belh tawh bawk. Hei bakah hian Chief Minister Pu Lal Thanhawla chuan naupang hruaina tur motor (Maruti Van) a lo pe tawh bawk.

Kum 2012 hian naupang 32 admit an ni a, an zinga 18 vel hi regular taka class kal thei an ni a, taksa lam harsatna avangin midangte hi chu an kal regular thei lo a ni, tunah hian zirtirtu pahnih awmin an ni hian School din tirh atanga tun thlengin an la thawk char char a, mithahnemngai te hnen atanga tanpuina School in a dawn atangin honorarium thlakhatah Rs. 1500 an la a ni.

Shalom Special School Managing Board chuan an School hmangaihtu te leh tanpui thin tu te chungah lawmthu an sawi a, thil pek an dawn zinga mi Wheel Chair pakhat chu J.N. Hospital Serchhip hnenah damlote hman tangkai turin an donate dawn thu an sawi bawk.



Source: DIPR, Serchhip