MJA TEN MIZORAM HSLC TOPPER 2017 AN CHAWIMAWI


Dated Serchhip, the 8th May, 2017: Vawiin chawhma dar 11 khan Mizoram Journalist Association, Serchhip District chuan I&PR Conference Hall Serchhipah, tun hnaia Mizoram Board of School Education HSLC result, 2017 chhuaka Mizorama 1-na dinhmun hauhtu Laldintluanga chawimawina hun an hmang.

He Topper chawimawina huna thusawi tura a bika sawm, Pu K. Saitluanga, MIS, DIPRO Serchhip chuan Topper Laldintluanga hian Serchhip khua mai ni lovin Serchhip District a chawimawi a, District chhunga zirlaite tan phurna nasa tak a hnutchhiah a, zirna in leh zirtirtute inrintawkna nasa zawk a pe a ni, a ti a. Chutihlaiin vawiina chawimawina dawng mi hlawhtlingte hi naktuka mi hlawhchham an nih leh theih tho avangin theihtawpa a zirna chhunzawm zel turin a fuih a ni. Tunlai khawvelah a fing ber, a chak ber leh zei ber berte aiin bansan ve duh hauh lote hi an dingchhuak fo zawk a, kan beidawn hma chu tuman hlawhchham mi ti thiang lova ni. Chu rilru chu Laldintluanga leh HSLC a hlawhtling ta, hmalam pan zel turte, hlawhtling zo ve ta rih lo, beihnawn leh hmabak zawng zawngten thinlungah vawng tlat ila a pawimawh hle a ni, a ti bawk. District MJA ten Topper chawimawina chang an hria chu lawmawm a tih thu sawiin Laldintluanga hnenah hian lawmpuina pawisa fai a hlan nghal a ni.

Pu C. Ramengmawia, Vice President, MJA Serchhip pawhin lawmpuina thu sawiin tuna hlawhtlinna duhawm tak hi a tawpna ni lovin a bul tanna mai chauh a la nih avangin nasa lehzuala tan la turin Dintluanga hi a chah a. A hma lam hun atan eng nge tha ber ang tih ngaihtuah chungin, a hniak tam lam lam zawh mai lova, a tana tha tur thlang thiam turin a fuih a ni. Nunchang mawi, nu leh pa leh zirtirtute thuawihna rah sengtu Dintluanga hian District dang atang pawhin Mizoram topper a nih theih tih a tichiang a, amahah entawn tur tam tak kan nei a ni, a ti.

He hunah hian MJA aiawhin Pu Lalremruata Ralte, Editor Ramlai Arsi chuan Chawimawina thuziak leh pawisa fai Rs. 2000 an hlan a. Inkhawm kaihruaitu Pu C. Lalhminghlua, President, MJA Serchhip pawhin fuihna thu tha tak sawiin chhungkaw aiawhin Laldintluanga Pa Pu C. Lalengthanga pawhin thusawina hun a hmang bawk a. Chhun thingpui inhona an nei zui nghal a ni.

Kan hriat tawh angin Laldintluanga, Pu C. Lalengthanga fapa, Serchhip Chhim venga cheng mek hian Marian High School, Serchhip atangin HSLC 2017 ah hian Mark 474 hmuin Mizoram puma pakhatna dinhmun ropui tak a luah a ni.

Source: DIPR, Serchhip