SERCHHIP DISTRICT- AH NLUP “ONE VILLAGE -ONE CROP” CHUNGCHANG SAWIHO


Serchhip, 8th May, 2014: May ni 2, 2014 a NLUP Implementing Board, NLUP Line Department leh District Bawrhsap ho thukhawm thuchhuak bawhzuiin vawiin chawhma dar 10:30 khan Serchhip DC Meeting Room-ah NLUP 3rd & 4th Phase a “One Village – One Crop” kalpui anih dan tur chungchang sawiho a ni a, District Bawrhsap mawhphurhna la mek tu Pu V.L.Remliana, MCS, Addl.DC in kaihruaiin NLUP Line Department hotute leh District chhunga Village Council hrang hrang aiawhte an tel a ni.

Pu V.L.Remliana chuan NLUP 3rd & 4th Phase a “One Village – One Crop” kalpui a tulna chhan te leh meeting koh anih chhan te a sawifiah a, NLUP hlawhtling lehzuala kalpui anih theih nan Sawrkar hotuten ruahmanna thar an siam a, hei hi zah thiama ngaihpawimawh a tul a ni tiin; kalphung ngai rengin kan beisei ang hmasawnna min thlen loh chuan kalphung thlak danglam ngam a tul a, rilru zau put a tul a ni a ti a, khaw tinin NLUP kaltlanga Trade thlanah uar bik an neih a a hlawma an kalpui chuan hmun khat atanga tharchhuah a tam ang a, a leitu tur Company tan pawh rang zawk leh awlsam zawkin a lei theih zawk dawn a ni a ti bawk.

Vawiin thutkhawmah hian NLUP Line Department hrang hrang hotu ten “One Village – One Crop” kalpui dan tur atana tha ni a an hriat te leh an ngaihdan te an sawi theuh a, hemi hnu hian Village Council hruaitute nen sawiho niin, mahni VC huamchhunga Trade thlan tur atana thutlukna siamfel sa khua te chuan an thutlukna leh ngaihdan te an sawi chiang nghal a, thutlukna mumal la siamfel theilo khua te chuan Line Department te nen indawr in an sawiho leh a, Line Department ten an khaw tana tha tur ni a an ngaih chungchanga thurawn an pek chu uluk taka lo ngaihtuah a rang thei ang bera an thutlukna te NLUP Cell a thlen lehnghal turin an in chah a ni.

“One Village – One Crop” atana ruahmanna siam te hi May ni 13, 2014 aia tlai lovah NLUP Implementing Board hnenah thehluh vek tur a ni.

Source: DIPR, Serchhip