THENZAWL-AH SERCHHIP BAWRHSAP HOVIN “SWACHH BHARAT MISSION (URBAN)” KICK-OFF A NI


Serchhip, 7th October, 2015 : UD&PA Department, Serchhip District leh Thenzawl Students Welfare, Aizawl tangkawp hmalakna in vawiin chawhma dar 10:00 khan Thenzawl Public Playground ah “Swachh Bharat Mission(Urban)” kick-off programme buatsaih a ni a, Serchhip District Bawrhsap Dr. Lalrozama, IAS chuan khuallian niin he hun hi a hmanpui.

Bawrhsap chuan mipui kalkhawm hma ah thusawiin UD&PA leh Thenzawl Students Welfare, Aizawl ten rem hre tak maia programme an siam chu lawmawm a tih thu te, zirlaite a kul a taiah an tang ani tih a hriatin phurna nasa tak a neih thu te a sawi a, mipuite telvena programme hetianga siam ani chu Democracy rama kan tih tur reng a ni tiin zirlai kalkhawmte pawh faina an thinlunga tuh nghet turin a chah a, an taksa an enkawl fai chuan an hriselna a tha dawn a, chu chuan taimakna leh tho thang thatna a thlen ang a, an thluakin hna a thawk tha thei bawk ang a, anmahni an fai bakah an zirlai thlengin a pui dawn a ni tiin Thenzawl khua chu khawfai leh khaw thianghlim an nih ngei theih nan duhsakna a hlan a ni.

UD&PA Department-in Thenzawl Students Welfare, Aizawl ten Thenzawl-a Swachh Bharat Mission tha taka an kalpui zel theihna tur tanpuina an ruahman Rs. 50,000/- chu Bawrhsap hian Thenzawl Students Welfare, Aizawl hnenah a hlan nghal bawk a ni.

Kick-off Programme zawhfel anih hnun hian Thenzawl Students Welfare, Aizawl te kaihhruaina hnuaiah Thenzawl khaw chhunga Zirna In zawng zawnga zirlai ten Thenzawl khawchhung hmung hrang hrang thenfai hnatlang an nei nghal bawk.

Vawiin kick-off programme hi Pu ST Lalhmingmawia, Sanitation Officer, UD&PA Department, Serchhip in a kaihruai a, Pu Lalhmangaiha Chawngthu, Swachh Bharat Mission Ambassador in fuihna thu a sawi bawk a ni.

Vawiin kick-off programme ah hian Thenzawl khawchhunga sawrkar hnathawkte, khawtlanghruaitute, chanchinbumite, zirtirtute leh Thenzawla Zirna In, Elementary School atanga Higher Secondary School, awm zawng zawng a zirlaite an tel tha hle a, Bawrhsap hi Serchhip atang Er. Lalhruaia, Sr. EE, PHED leh Pu Andrew H Lalremruata, MIS, DIPRO ten an tawiawm a ni.

Source: DIPR, Serchhip