E-ROLL KHAWIHTU OFFICER TAN SPECIAL DRIVE KALPUI DAN TUR INHRILH HRIATNA NEI


Dated Serchhip, the 7th June, 2017: Vawiin hian Serchhip DC Video Conference Room ah Serchhip District chhunga Electoral Registration Officer, Assistant Electoral Registration Officer leh District Election Office lama thawktu Officer te tan Special Drive, 1-31 July, 2017 inkara neih tur kalpui dan inhrilh tharna hun. District Election Officer Pi Sangchhin Chinzah hovin neih a ni.

Pi Sangchhin Chinzah chuan, electoral roll leh election thil chu engtiklai pawhin khawih reng mahila thil thar awm reng thin leh inzir zel ngai hna a ni a. Kumina Election Commission lamin kum 18-21 inkar Special Drive a buatsaih phei hi chu kan tih fo lem loh thil a ni. Hei vang hian he Drive hi hlawhtling taka kan kalpui theih nan keini a mawhphurtu officer te hi kan pawimawh ber a. Tin, a kalpui nan internet (EROnet) hman vek tawh tur a nih bawk avangin uluk taka kan intuaihriam a tul a ni, a ti. Pi Sangchhin Chinzah chuan, mipui thlan roreltuten ro an relna rama awm kan nih angin he Drive in a tum ber chu roll a chuang tur chi khua leh tui zawng zawng, eng mi pawh roll a thun a, a huna vote thlak ngei tura buatsaih a ni, a ti bawk.

Special Drive hi 1 July – 31 July, 2017 chhunga polling station zawng zawnga neih tura kalpui mek a ni a. He Drive in a tum ber chu khua leh tui kum 18-21 inkar Roll a la chuang lo zawng zawng zawnchhuah leh thunluh a ni. Hetih rual hian siamthat, paih, insawn ang chi (continuous updation) pawh kalpui reng tho tur a ni.

Vawiina Officer kalkhawm te hian, Election Commission of India ruahmanna anga Mizoram Chief Electoral officer in hmalak dan tur a rawn duante a indawtin an en hova, BLO te training buatsaih chhoh dan tur Election Branch lamin an duante an sawiho bawk a, chumi zawhah internet hmanga an hnathawhna tur programme (EROnet) chu zirhona an nei leh a ni. Heng an thil zir leh hmalak dan tur ruahmanna te hi an bial chhung theuhva Booth Level Officer te June ni 14 hmain training an neihpui leh vek dawn a ni.

Source: DIPR, Serchhip