PU RONALD SAPA’N SERCHHIPA HMASAWNNA HNA THAWHTE A TLAWH


Serchhip, 7th June, 2016 : Nimin chawhnu khan Pu Ronald Sapa Tlau, MP (RS) chuan Serchhip khaw chhunga hmasawnna hna thawh mekte a hmuna kalin a enfiah a, District Bawrhsap Dr. Lalrozama, IAS leh official pawimawh dangten a tawiawm.

Pu Ronald Sapa Tlau hian Serchhip VC-VII huam chhunga leimin danna leh ke-a kalna tur MGNREGS sum cheng Nuai 3 leh Sing 5 senga siam chu a en hmasa ber a, sum tlemte senga hna tha tak thawh a ni chu lawmawm a tih thu a sawi a, Serchhip P&E venga tuizem lian litre nuai 6 dawng, cheng nuai 25.23 senga siam chu a en bawk a, he tuizem lian hi MGNREGS leh PHE Department Serchhip nena tangkawpa siam a ni.

District Soil & Water Conservation Department Office Serchhip building chu tlawhlehin, a building a hlui tawh thu leh thawm thata a tul tawh thu thawktuten an lo thlen nghal a ni. Hemi hnu hian District Research Office tur sak mek, cheng nuai 60 senna tura ruahman chu tlawh lehin hmanraw hmante leh hnathawh tawhte pawh a tha hlea a hriat thu a sawi a. Chumi hnuah District Agriculture Office tur sak mek cheng nuai 90 senna tur chu tlawh lehin a building sak phung leh hmawnraw hmante pawh a tha hlea a hriat thu a sawiin, contractor ten hna an uluk hle nia a hriat thu leh lawmawm a tih thu a sawi ani.

Pu Ronald Sapa Tlau hi District Bawrhsap bakah Pi Teresy Vanlalhruaii, Project Director DRDA, Er. Lalhruaia, Sr.EE, PHED, Pu Zothansang Intoate, Sr.EE PWD, Pu Vanlalrova, BDO Serchhip bakah Officer pawimawh tak tak te leh Sub-Hqtrs. YMA hruaituten an tawiawm a ni.

Source: DIPR, Serchhip