WOMEN COMMISSION CHAIRPERSON-IN CHENG NUAI 28 SENG A SAK EAST LUNGDAR ICDS PROJECT OFFICE BUILDING THAR HAWNG


Serchhip, 7th April, 2016 : Hrangturzo bialtu MLA, State Women Commision Chairperson ni bawk Pi Vanlalawmpuii Chawngthu chuan vawiin chawhnu dar 1:00 khan Rs. 28,00,000/- seng a sak East Lungdar ICDS Project Office building thar chu East Lungdar ICDS Complex ah a hawng.

Pi Vanlalawmpuii Chawngthu chuan ICDS Office Building thar luah theih a peihfel ani ta chu lawmawm a tih thu sawiin, hnathawktute thahnemngaihna leh taimakna te, an thawhrimna ten rah tha a chhuahin malsawmna an dawng zel a ni a ti a, East Lungdar khua ami ngeiin Anganwadi hna thawk tha chawimawina "National Award" an dawng thei chu te chuan an hnathawh thatzia a tilang chiang hle a ni a ti bawk. ICDS kaltlanga hnathawhte chu Pathian rawngbawlna pawimawh tak pakhat ani tiin mi harsa leh tar chaklo te, naupang te leh hmeichhe rahbi tleu tawh te an enkawl thin chu an ngaihsanawm ani a ti a, ram changkang apiangin upa te, naupangte leh rualbanlote ngaihpawimawh nahang an hria ani tiin Mizote pawh hetih kawngah hian kan thangharh tan mek ni a a hriatthu a sawi bawk.

Pi Awmpuii chuan a bial chhunga Sawrkar hnathawk, abik takin zirtirtute chu bial pawn lama insawn chhuah khel mai lova thahnemngai taka khawtlang tana an rawngbawlna a tui turin a ngen a, an chhungkhat laina te leh khawtlang hruaitute pawh insawn khel a amah dawr lo hram turin a ngen bawk a, Sawrkar hmalakna kawng hrang hrangah thahnemngai taka mipuite puihna ngen in thawhhona tha neih pui zelah a sawm a, East Lungdar ICDS Nutrition Godown thar tha tak sak sak a tum thu sawiin ICDS Complex panna kalkawng pawh siam that thuai anih theih nan tan lak sak a tum thu a sawi bawk a ni.

Khualzahawm District Bawrhsap Dr. Lalrozama, IAS pawhin thu sawiin mihringte hi kan pian tirh atanga kan hun tawp thlengin zirtur nei kan ni a, abik takin naupangte enkawltu Anganwadi Worker te hnathawh that a taka a hmu thei chu vannei a intih thu a sawi a, naupang ten Anganwadi centre an ngainat a an kal chak ngawih ngawih theih nan boruak nuam tak siam sak reng turin a chah bawk a ni.

Vawiin East Lungdar ICDS Project Office Building thar hawn inkhawm hi Pi B.Lalhmangaihi, CDPO in kaihruaiin Pi C.Laltleipuii, MCS, BDO/Chairman, East Lungdar ICDS Project in inlawmna thu a sawi a, Pi Vanlalpianpuii, State Programme Officer, ICDS Project leh Pi Remliani Chawngthu, District Project Officer ten thu sawiin Anganwadi Centre hrang hrang a a naupang ten item benglut tak tak an entir a, Serchhip leh Aizawl atang Official engemawzatin he hun hi an hmanpui bakah khawtlang hruaitute pawh an tel tha hle a ni.

East Lungdar ICDS Project Office Building thar hi Sawrkar laipuia Ministry of Tribal Affairs hnuaiah Article 275 of Constitution kaltlanga sak niin November 2015 a sak tan a ni a, February, 2016 ah sak zawh fel a ni. Tun dinhmunah CDPO enkawlna hnuaiah awmin Circle Officer 3, LDC 1 leh IV-Grade 2 an awm a, a, khaw 16 a Anganwadi Centre 60 an enkawl a, tunah hian naupang kum 6 hnuai lam 2930, Tar pension la 690, Rualbanlo tanpuina dawng 19, hmeithai pension la 23 an awm a, heng bakah hian raipuar te, nu nau pawm te leh hmeichhe tleirawl rahbi tleu palh engemawzat an enkawl bawk a ni.

Source: DIPR, Serchhip