GREEN MIZORAM DAY 2017 HMAN DAN TUR REL


Dated Serchhip, the 6th June, 2017: Nimin 5th June tlai khan Bawrhsap Pi Sangchhin Chinzah hovin a pisaah Serchhip District Level Green Mizoram Committee te chuan kan hmalawk Dt 11.6.2017 a Green Mizoram Day, 2017 lo thleng tur hman dan tur an rel.

Pi Sangchhin Chinzah chuan, thing leh mau te an chereu zel avanga kan tawrhna hi khawvel huapa kan thlir thiam lo anih pawhin kan ngaihven duh anih chuan kan hrethiamin a rinawm. Hman ni lawkah chuan kan chenna in te, kan pisaah te Fan vuah a ngailo, boruak a nuam tawk kan ti thin. Mahse tunah chuan Fan vuah mai duh tawk lovin chhungkaw tam tak chuan Air Condition (AC) kan lalut fur tawh mai a ni. Thing leh mau humhalhna kawngah nasa zawka kan thanharh a ngai a, Green Mizoram Day hnuaiah Serchhip leh a chhehvel hi a zau thei ang ber a hring vek ngei tur a ni, a ti.

Kumin Green Mizoram Day hi Pathianni a nih avangin June ni 9 (Friday) hian Day hi hman tur a rel a ni a. Kum 2015 a Department hrang hrangten chan pual an semna Zawlpui kawng leh Eklavya School Compound a hma an laknate umzui tura ruahmanna siam a ni. Kum 2016 ah khan State Level Day hi Thenzawlah hman a ni a, chu chu District hian a zawm ve avangin kum 2015 a plot insem te kha kumin hian umzui a, a tul anga phun belh leh hung that tha a ti a ni. A hawnna inkhawm tawi hi Zawlpui kawnga DC Plot Area ah zing dar 10:00 ah buatsaih a ni anga, chumi hnuah Department tin ten an chanpual theuh te an pan nghal dawn a ni.

Kum danga lo tih thin angin Green Mizoram Day ah hian ram kang ven lama chanchinbu thawkthate hnenah te, ram kang ven kawnga thawk tha khua ho hnenah te, Green Mizoram Day thingphun enkawl zui tha Department emaw pawl hnenah te lawmman siam leh tum a ni bawk. Nimina District Level Committee in ruahmanna a siam lai hian State Level ruahmanna la hriat kim chiah loh deuh anih avangin State Level ruahman dan a zira a tul anga tih danglam theih tura dah a ni bawk.

Nimina meetingah hian District Level Committee member te an kal tha hle a ni.

Source: DIPR, Serchhip