E. LUNGDARAH WORLD ENVIRONMENT DAY 2016 PUALIN ART WORKSHOP NEI


Serchhip, 6th June, 2016 : Nimin piah Dt.4.6.2016 khan E. Lungdar BDO Conference Hall ah IWMP Project III Serchhip, E. Lungdar BDO, E. Lungdar ICDS leh Aizawl Art Gallery te tangkawpin an buatsaih World Environment Day (5.6.2016 Sunday) puala Art Workshop neih a ni a, leilung leh a chhunga nungchate hmuhalh a pawimawh zia tilang thei lemziak hona High School naupang thlanchhuah te nen neih a nih bakah, BDO leh ICDS Complex ah thing phunna neih nghal a ni.

A hawnna inkhawm ah E. Lungdar BDO Pi C. Laltleipuii chuan, Pathianin min pek leilung leh a chhunga nungcha tinreng te hi mihringte tana siam an ni a, an tello chuan keini pawh kan dam khawchhuak zo bik lo a ni. Chuvang chuan leilung venhim leh enkawl lama zirtirna tha uar taka kan neih a ngaia, lemziak mawi leh duhawm tak tak hmangin chutiang inzirtirna pawh chu hlawk taka kalpui theih a nih avangin E. Lungdar leh a khaw chhehvela High School zirlai, lemziak lama tui bikte nen World Environment Day 2016 denchhenin Art Workshop an buatsaih tih a sawi a. Thupuiah zero tolerance for the illegal wildlife trade tih chu hman a ni.

He Art Workshop ah hian E. Lungdara ICDS Anganwadi Centre pahnih building chhungah naupangte nun tihlim thei tur lemziak mawi tak tak engemawzat dah thar a ni a, Forest Department ten en pek thing tiak engemawzat ICDS leh BDO Complex ah an phun bawk. Tin, Workshop a tel naupangte hnenah lemziakna hmanraw tha tak tak an sem nghal bawk a ni.

He Workshop ah hian Aizawl Art Gallery atangin lemziak thiam engemawzat an kum 10 tlinna champha lawmna ni pah fawmin an tel ve nghe nghe a ni.

Source: DIPR, Serchhip