TUNLAI VAWK PUL HRI LENG PRRS LAKA INVEN DAN TUR LEH VAWK DAMLO ENKAWL DAN TUR CHUNGCHANGA MIPUITE HRIATTUR PAWIMAWH


Serchhip, 6th May, 2016 : Porcine Reproductive & Respiratory Syndrome (PRRS) hi Virus avanga Vawk-a natna lo awm, kawng 2 - a chi thlahna leh thawkna kawnga natna lang chhuak thin a ni a, he natna hian vawk in taksa a natna do theihna (immunity) a neih a tihniamin an thih phah fo thin a, boruak a inkaichhawn theih (air-borne disease) anih vangin fimkhur a ngai lehzual em em a ni.

NATNA LANCHHUAH DAN:

Vawk no piang hlimah –
1. Khawsik, Pneumonia, Chaw ei duh lo.
2. Secondary bacterial infection avangin an thi thin.
Vawk puitling tawh leh a pa chi thlah te chuan lang chhuak lovin (subclinical infection) he natna hi an vei tlangpui. Ran puitling chu an thi meuh lo.

Vawk rai laiah –
• A no neih dawn hnaiah a chhiat thin
• A thi sa in no an hring thin
• A note dam chhun pawh an chak lova, rei loteah an thi mai thin.
He natna an vei tawh chuan an taksa chakna a tla hniam a, an chuap a tihchhiat avangin natna dang an kai hma a, thawkna kawngah harsatna an nei thin.

A ENKAWL DAN:
• Specific treatment a awm lo.
• Secondary Bacterial Infection ven nan broad spectrum antibiotic hman a tha. Khawsik te an neih thin avangin nachhawkna (anti inflammatory) pek tur.
• An taksa tih chakna turin immune booster hman a tha
• Dehydration ven nan fluid therapy a theih chuan hman bawk tur.

INVEN DAN TUR:
• Tha takin kan farm kan hung tur a ni.
• Vawk in leh a vel bungrua te regular takin damdawi (disinfectant) hmangin kan silfai thin tur a ni.
• Vawk vulhtu ten midang vawkte hnaih lo tura fimkhur tur, tin, vawk in a kalna bik thawmhnaw neih a tha.
• Kan vawk te mi entir mai mai loh tur, a bikin vawk vulh ve tho te leh vawk nena inhnaih taka khawsa thin te.
• Vawk kan lak thar dawn chuan PRRS natna laka fihlim ngei kan la tur a ni.
• Kan vawk talhna thli leh sa nawi kan paih reng reng tha taka then fai thin tur, phum emaw, halralin emaw.
• Vawkpui pawltir/kah rai tur kan neihin a pa/chi he natna laka fihlim chauh hman tur a ni.
• Ran damlo hlek chu Phone hmanga be mai lovin Vety Dispensary ah kalin Doctor rawn vat thin tur a ni.
• Ram damlo thi reng reng dai vela paih mai mai lovin, thuk tha taka phum bo/halral tur a ni.
• Ram damlo enkawltu leh ran thi sawngbawltu ten mahni thawmhnaw inbel suk fai nghal tur a ni.

Source: DIPR, Serchhip