SERCHHIP A DIGITAL WEIGHT BRIDGE SIAM THAT A NI


Serchhip, 6th May, 2016 : Serchhipa Food, Civil Supply & Consumer Affairs Department Supply Godown-a kum khat chhung vel hman theih tawh loha awm Weight Bridge chu siam that a ni a, vawiin khan Legal Metrology Department ten an endik.

He Weight Bridge siam tur hian Mizoram sawrkarin LH Thanga Enterprise a thlanga a, an ni hian Statweight India Pvt. Ltd. Bangalore te chu thlang ve lehin, he weight Bridge siam that hna hi thawh a ni a. He Weight Bridgeah hian Tum khatah 40 tons a rit a buk theih dawn a ni. Legal Metrology Department chuan an khawl, Test Kit Machine hmangin an endik a. Siam that ngaite siam that anih hnuah Legal Metrology Inspectorte hian a hmantlak ani tih an nemnghet a ni.

Pu K. Rosangmawia, DCSO Serchhip chuan naktuk atanga he weight bridge hi hman nghal tura thupek chhuah a nih thu leh thupek hi khawng taka kalpui anih tur thu a sawi a, retailer ten kum khat chuang harsatna an lo tawh thin chu hei hian a chhawk zangkhai ngei a beisei thu a sawi bawk.

He Weight Bridge hi Pu Lalsangzuala, Inspector Legal Metrology Serchhip bakah Pu Chalneihkima, Inspector leh Pu Lalramchhana, Inspector Legal Metrology Department Aizawl a mi ten an endik a ni.

Source: DIPR, Serchhip