FINANCE MINISTER IN GROUP YMA CONFERENCE HMAN PUI


Dated Serchhip, the 6th April, 2017: Nizan Dt. 5.4.2017 khan Pu Lalsawta, Minister Finance, Planning etc., chuan Tawitlang Group YMA Conference vawi 43-na, Chhingchhip Venghlun Hall-a hman meka vantlang inkhawmah khuallian niin a hmanpui.

He vantlang inkhawmah hian thu sawiin Pu Lalsawta chuan, “Mizoramin hnam anga inpawlkhawmna lian leh chak tak YMA kan nei hi kan vannei bik hle a. Khawvela hnam puala inhuikhawmna, intihhlimna, inzirtirna pawl (institution) nei tha berte zinga mi kan nih a rin thu sawiin hnam vannei tak kan ni” a ti. Mizoram sawrkarin mipuite tana hma a lakna thar tha tak a siam thu sawiin Pu Lalsawta chuan, retheihna um bova, khawvel eng hmu phaka Mizoram mipuite kan awm theih nan sawrkar chuan New Economic Development Policy (NEDP) a duang a. He Policy hnuaiah hian mi taima, dingchhuak thei ngei tura hma la tute tan kawng zau taka hawn a ni a. Chutiang mite tanpui tur chuan sawrkar a inring tawh a ni, a ti. Tin, NEDP chu mamawh intawm siamna tur leh mi taima leh thawk tak taktute tana remchang siamsaktu (facilitator) a ni dawn bawk a. Tanpui tlak mi tam tak kan thalaite zing atanga lo chhuak turin ka sawm che u a, hnam dang ram dang mite mahin an ram chu dinhmun sang takah an hlangkai thei a nih chuan kan theih loh chhan tur a awm lova, kan ti ve thei a ni, a ti.

Minister hi Dr. C. Vanlalramsanga, Secretary Planning, Dr. Saithantluanga, Jt. Director, Agriculture, Pu Vanlalruata, Deputy Director, Horticulture ten an tawiawm a, heng official pawimawhte nen hian nimin tlai lam khan Chhingchhip khuaa loneitu leh kuthnathawktu hrang hrangte nen inkawm hona an hmang bawk.

Nizana Vantlang inkhawm buatsaih hi Pu H. Lalruatliana, Finance Secretary, Tawitlang Group YMA chuan a kaihruaia, zaipawl, mimal zai te leh Cebtral YMA aiawh palaite thusawi ngaithlak a nih bakah kum kalta chhunga YMA member boral tete sunna hun hman a ni bawk.

Tawitlang Group YMA Conference vawi 43 na hi Dt 4.4.2017 Thawhlehni atanga neih tan niin vawiin Dt 6.4.2017 zan thlenga neih tur a ni a, Palai riaklut 200 an awm a, Group huam chhungah hian khaw pakua leh YMA Branch 12 an awm a ni.

Source: DIPR, Serchhip