DISTRICT DISASTER RESPONSE FORCE (DDRF) LEH SEARCH & RESCUE TEAM DIN A NI DAWN - DECEMBER NI 14 AH MEGA MOCKDRILL NEIH A NI ANG


Dated Serchhip, the 5th December, 2016: Vawiin hian Serchhip District Disaster Management Authority (DDMA) thutkhawm leh Mega Mockdrill neihna tura mawhphurtu hrang hrangte telna Coordination Conference chu DC Committee room-ah a ruala neih a ni a, Bawrhsap Dr. Lalrozama, IAS chuan a kaihruai.

Dr. Lalrozama chuan, chhiatna chi hrang hrangten min chim ni a thleng palh thei a, enge lo thleng ang a, engtikah nge, engtianga nasa in nge a lo thlen ang tih ngaihtuah thiam lo mah ila, engemawti kawng tala lo inbuatsaih lawk hi a fin thlak a ni, a ti a. Ramin chhiatna a tawh palh chuan sawrkar hnathawhte leh tlawmngaipawlte chu mipuite chhanchhuahna leh enkawlna kawnga mawhphurtu tur kan nih avangin ruahmanna fel tak neisa ainkaihhruai a pawimawh thu a sawi a, Department tinin Emergency Support Function Plan nei tura tih tawhte pawh ngaipawimawh thar tur leh Office hmun remchangah Staff tinte mawhphurhna Chart hmanga langsar taka tar reng turin a ngen bawk. Bawrhsap hian National Disaster Management Authority te ruahmannaa Mega Mockdrill December ni 14 a Serchhipa neih a nih tur thu a tarlang a ni.

Vawiina Coordination Conference hian Serchhip District Disaster Responce Force; Police, YMA leh Department lam atanga technical leh medical lam mite telna din an rel a, tin Search & Rescue team, YMA member, hetiang lama lo training tawhte awmna tur din a rel bawk.

Mega Mockdrill hi Serchhip khaw kiang, Dawngzawl ram lei chhungril km 30 a thuka Magnitude 7 vela naa lir rawn nghing anga chan chhin tur a ni a. Amaherawh chu khawchhunga mipui nitin nunphung a khaihlak nasat loh theih dan ber tur ngaihtuah chungin hmun thlan bik heng; Serchhip Bazar Building, Government Higher Secondary School leh DC Office ah te chhiatna thleng anga lemchan a ni ang. Hetah hian District Disaster Management Plan leh Incidence Response Sysrem kan neihte zulzuia mawhphurhna neitute leh hmanrua kan neihte hmanchhin leh enchhinna angin kalpui a ni dawn a ni. Vawiinah hian Mega Mockdrill neihnaa chanvo hrang hrang neitutte leh hmanraw mamawhte sawihona hun neih nghal a ni.

Vawiina meetingah hian SP Pu Lalringdika bakah District Disaster Management Authority member te, tlawmngaipawl aiawh hrang hrang te, Head of Offices hotel eh Disaster Department aiawh District organisers te an tel a ni.

Source: DIPR, Serchhip