SERCHHIP LEH EAST LUNGDAR-AH NLUP 2nd PHASE HNUAIA VAWK VULH THLANGTUTE HNENAH VAWKTE 4 LEH A ENKAWL ZUINA TUR SEM A NI


Serchhip, 5th December, 2014: Vawiin Chawhnu dar 01:00 khan Serchhip District Animal Husbandry & Veterinary Office tualah NLUP hnuaia vawkvulh thlangtu, Second Phase a mite tan 3rd Installment sem a ni a, beneficiary tinte hian vawk note pali ṭheuh leh a chaw man tur Rs. 10000/- bakah vitamin an dawng ṭheuh a ni. 2nd Phase a mite tan hian 4th Installment sem tur Rs. 20450/- la awm chu a dawng chhunzawm tlaka ngaihte hnenah kumin chhung ngeia sem leh hman tum a ni bawk.

NLUP semna hun hi Dr. Vanlalenga DVO chuan a kaihruai a, thu sawiin ‘NLUP kan sem ṭanna a rei tawh viau laia tun thlenga vawk note ram dang aṭanga chawkluh kan la mamawh chu ṭanpuina dawngtu te tan inenlet nachang hriat a ṭul a tih thu a sawi a, tun ṭumah pawh hian thawktuten vawk pul hri danna pe tur leh endikna nei nghal turin an umzui vek dawn thu sawiin ṭanpuina dawng chhunzawm tlak ngei tura theihtawp lo chhuah turin a sawm a ni.

He hunah hian department lam aṭangin mithiamte chuan ran enkawl dan tur tlangpuite an sawi a, ran vulhte hriselna thuah harsatna nei chuan chhiatna leh channa nasa zawk a thlen hma ngeia thawktute hnen thlen nachang hre turin an chah bawk a ni.

Vawiin hian Serchhip District chhunga beneficiary 94 te tan Serchhip leh East Lungdar hmunah ṭanpuina hi sem a ni a, Serchhip leh a chhehvel khua te tan Serchhipah Benificiary 66 leh East Lungdar khua leh a chhehvel hnaivai tan chhungkaw 28 hnenah sem a ni.

Source: DIPR, Serchhip