SERCHHIP SUPERINTENDENT OF POLICE THAR IN KHAWTLANG HRUAITU TE LEH MJA TE KAWM


Serchhip, 5th October, 2015 : Serchhip Superintendent of Police thar Pu Lalringdika, MPS chuan vawiin chawhnu dar 3:00 khan a pisa ah Serchhip-a tlawmngai pawl hrang hrang awiawh te, khawtlang hruaitu te leh Mizoram Journalist Association member te kawmin thawhhona tha neih pui ah a sawm.

Pu Lalringdika chuan mipuite thawhpuina tel lovin hna a thawh tak tak theih loh a, mipuite tanpuina leh thlawpna an mamawh ani tih a sawi a, mipuite nen thawhhona tha an neih chuan an hna za ah sawmnga vel an zo tluk a ni tiin mipuite lakah beiseina sang tak a neih thu leh an finchhuah zel a beisei thu a sawi. Law & Order (Dan leh Thupek) kenkawh a tul hian mipuite nen in ep a tul chang a awm thin a, hetiang hunah pawh Dan pel a kal lo tura mipuite kan ven tlan angai a ni tiih hemi chungchangah hian tlawmngai pawl hruaitute leh thuthar thehdarhtute hriatthiam puina an mamawh hle a ni a ti a, Dan ang thlapa hma lak anih theih nana tanpuia, thu zaizap leh boruak nem zawnga mipuite khap dai a tul thin thu a sawi a, ruihhlo do kawngah pawh thil tisual an hriatchian an man dawn chuan a police te nen tanghova hmalak thin nise, hei hi Dan anga misual hrem an nih ngei theihna kawngah a pawimawh hle a ni a ti a, Police lam pawh kawng tamtakah insiamthat ngaihna an nei tih sawiin hemi kawngah pawh finchhuah a thurawn pe thin turin a sawm bawk a ni.

Serchhip SP in thu a sawi zawh hian tlawmngai pawl leh khawtlang hruaitu te pawhin thu sawina hun an hmang a, ruihhlo do bakah khawtlang muanna a awm theih nan hma lak dan tur leh tan ho dan tur zau takin an sawiho a, an thu thlen te pawh SP hian chhinchhiahin a theih ang anga bawhzui a tum thu a sawi bawk a ni.

Pu Lalringdika hi Mizoram Police Service, 1996 batch niin Serchhip ah hian kum 2008-2009 khan Additional SP in a lo awm tawh a, kumin Otober ni 1 khan Serchhip SP hna chelh turin Lawngtlai atangin a rawn in sawn a ni.

Vawiin inkawmhona ah hian Joint VC Serchhip, Sub-Headquarters YMA Serchhip, Sub-Headquarters MHIP Serchhip, Area MUP Serchhip, Zoram Drivers’ Union Serchhip leh Mizoram Journalist Association Serchhip District te an tel a, Serchhip SDPO Pu Lalchhuanawma Chhangte leh Serchhip DIPRO Pu Andrew H Lalremruata ten Serchhip SP hi an tawiawm a ni.

Source: DIPR, Serchhip