RUIHHLO DO BEIHPUI THLAKNA HAWNG


Dated Serchhip, the 5th August, 2016: Vawiin chawhnu dar 2:00 hian Serchhip DC Conference Hall ah Central YMA leh Mizoram sawrkar thawhhonaa Ruihhlo Do Beihpui Thlakna Kick Off chu Sub Headquarters YMA leh DC, SP leh Excise Department tang kawp ten an hmang a, Serchhip Bawrhsap Dr. Lalrozama'n a hawnna hun a hmang.

Thu sawiin Dr. Lalrozama chuan, ruihhlo hi a huatthlala a, nun ti chhetu, ram leh hnam hmelma, ralpui phiara phiar ngai a ni. Kan rilru, taksa leh thlarau nun thlenga vaw chhetu, thil thalo dang tam tak kaichhuaktu a ni. Kan beih nasat thin tehreng nen, lan ram awmnain a zir loh vang nge a rem hlei thei lova, nasa zawka kan beih a tul a ni. Vawiinah chung ruihhlo te nena indo kan puang a, thawktute zawng zawng, Police, Excise and Narcotics Department leh sawrkar hnathawk zawng zawngte kan tang mar reng tur a ni, a ti. Tha thlah miah lova ruihhlo do leh nungcha leh ramngawte venhim hna thawk rengtu YMA a fak bawk.

Serchhip SP Pu Lalringdika pawhin thu sawiin, Kristian ram nisi he ti taka ruihhlo in min tibuai hi a lungchhiat thlak hle a ni, a ti a. Ruihhlo hian ruk ruk, inrawk leh sualna dang tam tak a hrin belh thin avangin ruihhlo ngai neilo chhungkua zawng zawngte pawh min tibuai vek a. Kan hnam hmelma ani, a ti. Ruihhlo zuarte hrem an nih theih nan dan ang thlapa man an ngaih thu sawiin NDPS Act ang thlapa kan kal loh chuan kan duh angin misualten hremna an tawk thei lova, a theih chen chena dan anga kal zel tum turin ruihhlo dotute chu a ngen bawk.

He hunah hian Pu. Rongura, Superintendent, Excise & Narcotics chuan Narcotic Drugs & Psychotropic Substance (NDPS) Act chungchang leh MLPC Act chungchanga mipuite hriat tur pawimawh zual sawifiahna a nei a, Sub Headquarters YMA President, Pu R. Sanghmingthanga pawhin thu sawiin, Sub Headquarters YMA in Ruihhlo Do thawhhona Resolution a ruahman chu kalkhawm ten lungrual takin an pawm bawk.

Ruihhlo Do Beihpui hawnna inkhawmah hian Rev. H. Lallianzara'n hunserh hmangin, Thufingte 4:12 a "Hrui thum hrual chu a chat lawk lawk ngai love" tih thu sawiin Police, Excise & Narcotics Department leh YMA hrui thum hrual chu ram mipuite hian a fei a, chat lova ruihhlo a do mar reng an beisei dawna a hriat thu a sawi bawk.

Source: DIPR, Serchhip