SERCHHIP AH TEACHER DAY HMAN DAN TUR REL


Dated Serchhip, the 5th August, 2016: Vawiin hian Serchhip District Committee for Celebration of Teachers' Day chuan DC Office Chamber ah an Chairman leh Bawrhsap ni bawk Dr. Lalrozama, IAS hovin September ni 5 a Teachers' Day lo thleng tur hman dan tur an rel.

Chairman Dr. Lalrozama chuan, Teacher Day chu zirtirtuten an hnathawhna pawimawh zia leh ram tana an tangkai zia an hriat thar nanah hmang thei se a duh thu sawiin, zirlai naupangte inchawimawi tir ngawt mai tumna rilru chu a tha tawka a hriat loh deuh thu a sawi a. Zirtirtute Ni a nih ang ngeiin zirtirtute hlawkpui tur programme neih tha a tih thu a sawi hmasa a ni.

Committee chuan, Serchhip khawpui bikah chuan School hrang hrangten an remchan dana anmahni puala Teachers' Day hi an hman bakah zirtirtute zawng zawng tan Teachers' Day pual Seminar DC Conference Hall ah neih ni se tia rel a ni a, Seminar hi September ni 5, chawhma dar 10:30 am ah DC Conference Hall ah neih tur a ni ang. SDO leh BDO thuthmunah chuan State Level Guidelines siam zul zuiin lo ngaihtuah ve thung se tih a ni. Hmun danga mite chuan tul an tih angin anmahni pualin lo hmang ve hlawm se an ti bawk.

Chief Minister leh Education Minister thuchah te bakah District Level hma lakna in Deputy Commissioner thuchah chu siama Cable TV leh ziaka thehdarh tura ruahmanna siam a ni a. Serchhip khawpui chhung hmun remchang laiah Banner tar nise an ti bawk.

Kumin Teachers' Day ah hian State Level Committee chuan zirtirtu harsatna tawkte tanpuina sum (NFTW) tuak nan thil zawrh ni tawh lo se tiin a rel a, zirtirtu pakhatin Rs 50 theuh thawhin Private School zirtirtute pawhin hei hi thawh ve tura beisei an ni a, zirlaite hnenah chuan tihluihna tel lovin an rem chan dan anga thawh ve tura ngen nise an ti thung a ni.

Source: DIPR, Serchhip