MINISTER PU LALRINMAWIA RALTE IN SERCHHIP DISTRICT AH “ONE DAY OFFICE” HAWNG


Serchhip, 5th August, 2014: Environment & Forest, Labour, Employment & Industrial Training etc. chang tu Minister Pu Lalrinmawia Ralte chuan Serchhip District chhung khaw thenkhat tlawhin khawtlang hruaitu VC leh tlawmngai pawl hrang hrangte dawr theih turin an tapchhak zawlah a pisa a chhawp hnai sak a, a Department chan kaihhnawih thil chi hrang hrang chungchanga an khawtlang mamawh hrang hrang te bakah an vui leh vaina te a ngaihthlaksak a ni.

Minister hian niminah Thenzawl, Serchhip, Khawlailung leh North Vanlaiphai tlawhin khawtlang leh tlawmngai pawl hruaitu te chu anmahni hmu tura Aizawl an rawn kal changin an hun neih dan a inhmuh fuh loh thin vanga an thu thlen duh te in dawngsawng mumal hman lova an kir leh thin te hi a vei thu sawiin an tana hun tha siam sak a duh avanga hetiang hun hi buatsaih anih thu te, anmahni tapchhak zawlah ngei inpawh tlang taka ram leh khawtlang hmasawnna tur atana an thawh ho theih dan tur sawiho a inkawmho a duh thu te a sawi a, labour welfare scheme hnuaia kuthnathawktute hamthatna chi hrang hrang Sawrkarin a ruahman sakte leh thalaite eizawnna kawhmuh sak tura Sawrkarin hma a lakna ah te thingtlangmi ten an la hrechiang tawklo ni a a hriat thu te sawiin mipuite hnena zirtirna nasa lehzual pe a tan lakpui turin a sawm a ni.

Pu Lalrinmawia hian Thenzawla Vantawng Group YMA Hall ah khawtlang hruaitute kawmin Labour Welfare Board hnuaia inziahluh fel chungchang ngaipawimawh lehzual tura an khua leh tui te fuih nasa lehzual turin a chah a, ramngaw leh sik leh sa inthlak danglam chak lutuk ven kawngah Sawrkar tha tichak tura mipuite pawimawhna te pawh nasa lehzuala inzirtir turin a chah bawk, khawtlang hruaitu ten an mamawh leh harsatna chi hrang hrang an thlen te chu uluk taka chhinchhiahsakin hmun leh hmuna chhanfel nghal theih te chu Department hotute nen inrawn tlang nghalin a chhan sak a, chhanfel nghal theihloh chi te pawh a rang lama a bawhzui tur thu in a thlah a ni.

Thenzawl a tlawh hnu hian Serchhipah lutin Sub-Headquarters YMA, Serchhip Office ah khawtlang hruaitu VC te leh tlawmngai pawl hrang hrang aiawhte nen inkawmhona hun an hmang a khawtlang hruaitute thu thlen zing ami YMA Reserved Forest humhalhpui tura an ngenna chu chhangin Thenzawl DFO hnenah lo zirchianga a rang lama ruahmanna siam turin a hrilh nghal a, Serchhip-a Employment Exchange Office dah sak tura an ngenna leh thil dang dangte pawh uluk taka lo zirchiang a theihtawp chhuaha a hlawhtlin theih dan tur ngaihtuahpui a tum thu in a chhang a ni.

Serchhip atang hian Khawlailung panin BNRGSK Hall-a inkawmhona buatsaih ah an khawtlang mamawh an thlen chi hrang hrangte ngaihthlaksakin Minister hian ruahmanna tha zawkte a kawhhmuh a, khawtlang hmasawnna tur thil tam tak a sawipui bakah Department officialte hnen atang an mamawh thlen chungchanga thil awmzia leh kalhmangte inhrilhfiahna hun hman ani bawk.

Minister hian nizan dar 8:30 khan North Vanlaiphai Tourist Lodge ah khawtlang hruaitute leh tlawmngai pawl hruaitute kawmin an thu leh hla te uluk takin a ngaihthlaksaka, rawtna an siam te pawh sawizau puiin bawhzui nghal ngai chi thenkhatte pawh a ranglama Department mithiamte North Vanlaiphaia tir nghala zirchian tir a tum thu a hrilh a ni.

Minister hi Pu Liankima Lailung, C.F., Northern Circle, Pu C.Lalengliana, C.F., Southern Circle, Pu Vanlalthlana, ACF(CAMPA), Pu PC Lalchhandama, ACF(Planning), Pu Francis Lianmawia, AWC, LE&IT Department leh Pu Andrew H.Lalremruata, DIPRO, Serchhip ten an tawiawm a, an kalna khaw tinah hian Labour Welfare Scheme leh Vocational Training chungchang awareness campaign uar takin an nei nghal zel a ni.

Ruahman dan chuan Minister hian vawiinah Mualcheng, East Lungdar, Biate, Sialhawk leh Khawhai tlawhin Khawzawlah a riak ang a, naktukah Chawngtlai, Khawzawl leh Kawlkulh tlawhin khawtlang hruaitute a kawm hnu nah Aizawl panin a kir ang.


Picture: Lalrinmawia Ralte, Minister of State, GOM @ Serchhip

Source: DIPR, Serchhip